जिथे पोट भरलं तिथेच चोरीचा प्रयत्न, रखवालदाराला संपवलं; असा झाला खुनाचा उलगडा

चोरट्यांनी खून केल्यानंतर रोटोव्हेटरसहित ट्रॅक्टर पळविले. मात्र, ते अर्ध्या रस्त्यातच बंद पडल्याने जागेवरच सोडून चोरट्यांनी पोबारा केला होता. दरम्यान, अवघ्या २४ तासातच स्थानिक गुन्हे शाखेने खून करणाऱ्या दोघांना मध्यप्रदेशातून अटक केली आहे. दोघांनी खूनाची कबूली दिली आहे. पवन बहादीर बारेला (वय ३०, रा. बाघाड ता. राजापूर जि. बडवाणी) आणि बावरसिंग शोभाराम बारेला (वय २८, रा. सालीकल ता. राजापूर जि.बडवाणी) मध्यप्रदेश अशी अटक केलेल्या संशयित आरोपींची नावे आहेत.
जळगाव तालुक्यातील बिलवाडी येथीलच रहिवासी राजेंद्र ईश्वर पाटील यांचे वावडदा ते म्हसावद दरम्यान असणाऱ्या शेतामध्ये पांडूरंग पंडीत पाटील हे रखवालदार म्हणून काम करतात. ते मंगळवारी रात्री नेहमीप्रमाणे शेतात रखवाली करण्यासाठी गेले होते. दरम्यान, शेतमालक असलेल्या राजेंद्र पाटील यांच्याकडे पवन बारेला हा सालदार म्हणून कामाला होता. तो त्याच्या कुटुंबासह त्याच्या सासरवाडीला मध्यप्रदेशात गेला होता. मंगळवारी मध्यरात्री पवन बहादीर बारेला आणि बावरसिंग शोभाराम बारेला हे दोघे शेतातून ट्रॅक्टर चोरी करण्यासाठी आले होते. त्यावेळी झोपलेले पांडूरंग पंडीत पाटील हे जागे झाली. त्यांनी ट्रॅक्टर चोरीला विरोध केला. त्यावेळी पवन बारेला आणि बाबवसिंग बारेला या दोघांनी ट्रॅक्टरचे लोखंडी साहित्य पांडूरंग पाटील याच्या डोक्यात टाकून त्यांचा खून केला. त्यानंतर ते ट्रॅक्टर घेऊन पसार झाले. दरम्यान, चोरी केलेले ट्रॅक्टर देखील रस्त्यात बंद पडले. त्यामुळे ट्रॅक्टर जागेवरच सोडून दोघेजण दुचाकीने पसार झाले. या खूनाबाबत एमआयडीसी पोलीस ठाण्यात गुन्हा दाखल करण्यात आला.