यवतमाळ : यवतमाळ जिल्ह्यात मागील ४८ तासांत पाच शेतकऱ्यांनी कर्जबाजारीपणाला कंटाळून आत्महत्या केल्याच्या घटना मंगळवारी समोर आल्या. वसंतराव नाईक शेती स्वावलंबन मिशनचे माजी अध्यक्ष किशोर तिवारी यांनी प्रसिद्धीपत्रकातून ही माहिती दिली आहे.
आत्महत्याग्रस्त या शेतकऱ्यांमध्ये हिवरी येथील प्रवीण काळे, खिडकीचे त्र्यंबक केराम, शिवणी येथील मारोती चव्हाण, अर्जुना येथील गजानन शिंगणे व बाणगाव येथील तेवीचंद राठोड यांचा समावेश आहे. यंदाच्या हंगामात विदर्भात १,५८४ शेतकरी आत्महत्या झाल्या आहेत. मागील २५ वर्षांतील हा विक्रमी आकडा आहे. या घटनांसाठी केंद्र आणि राज्य सरकारचे चुकीचे धोरण जबाबदार असल्याचा आरोप तिवारी यांनी केला आहे. विदर्भातील शेतकरी नापिकीच्या दुष्टचक्रात अडकला आहे. लागवड खर्चात दुपटीने वाढ झाली आहे. बँकांकडून अपुरे पीककर्ज वाटप केले जाते. या एकूणच परिस्थितीमुळे शेतकरी आत्महत्या वाढल्याचा आरोपही तिवारी यांनी केला आहे.शेतकरी आत्महत्यांचे सत्र १९९७पासून सुरू आहे. कोलमडलेल्या ग्रामीण अर्थव्यवस्थेला मदत, पॅकेजेस कोणताही दिलासा देत नाहीत. राजकीय नेतृत्वाचा अभाव आणि व्यवस्थेतील अनियंत्रित भ्रष्टाचारामुळे विदर्भातील सर्वात मागासलेला प्रदेश आहे, असे किशोर तिवारी यांनी गावांना भेटी दिल्यानंतर सांगितले.
खूप कमी मागणी असलेल्या कापूस या मुख्य नगदी पिकामुळे विदर्भाची अर्थव्यवस्था कोलमडली आहे. लागवडीचा खर्च यामध्ये प्रचंड वाढ झाली आहे आणि बँकांद्वारे प्रदान करण्यात आलेल्या अत्यंत कमी पीककर्जामुळे संकटात आणखी भर पडली आहे. शाश्वतपीक अन्न, डाळी आणि तेलबिया पिकांना प्रोत्साहन देण्यात सरकार अपयशी ठरले आहे.‘संसदेच्या विशेष सत्रात चर्चा व्हावी’
विदर्भातील अत्यंत लहान प्रदेशात दररोज एकापेक्षा जास्त शेतकरी आत्महत्या होत आहेत. यातून भविष्यात पाच ट्रिलियन अर्थव्यवस्थेचा दावा फोल ठरत आहे. संसदेच्या विशेष सत्रात शेतकऱ्यांच्या आत्महत्यांवर सरकारने चर्चा करून पंतप्रधान नरेंद्र मोदी यांनी विदर्भाचा दौरा करावा. शेतकऱ्यांना आत्महत्येला भाग पाडणाऱ्या प्रमुख समस्यांचे निराकरण करण्यासाठी विषेय पॅकेज जाहीर करण्याचे आवाहनही तिवारी यांनी पंतप्रधानांना केले आहे.
Users Today : 25