वर्धा : कारंजा तालुक्यातील नारा येथील यादवराव केचे आश्रमशाळेतील विद्यार्थ्याची हत्या झाल्याचे स्पष्ट होताच हादरलेल्या पालकांनी आपल्या मुलांना घरी परत नेण्यास सुरुवात केली. सोमवारपर्यंत आश्रमशाळेत सर्वच विद्यार्थी घरी परतले होते. पोळ्यानंतर हे विद्यार्थी परतणार असल्याचा दावा आश्रमशाळा प्रशासनाकडून केला जात आहे.नाराच्या यादवराव केचे आश्रमशाळेत पहिली ते दहावीचे एकूण २८९ विद्यार्थी आहेत. मेळघाट, वर्धा आणि मध्य प्रदेशातून हे विद्यार्थी शिक्षणासाठी आले आहेत. मागील वर्षी १५० इतकी पटसंख्या होती. करोनानंतर पहिल्यांदाच ही संख्या वाढली आहे. विद्यार्थीसंख्या वाढल्याने प्रशासनाला दिलासा मिळाला. याच विद्यार्थ्यांमध्ये मेळघाटातील चिखलदरा तालुक्यातील डोमा येथील शिवम सनोज उईके हा बारा वर्षांचा विद्यार्थीही होता. ३० ऑगस्टच्या रात्री गाद्यांखाली त्याचा मृतदेह आढळला. या घटनेने संपूर्ण व्यवस्था हादरली. आईवडिलांनी हत्येचा संशय व्यक्त केला होता. यानंतर नागपुरात मृतदेहाचे शवविच्छेदन करण्यात आले. गुन्हा दाखल करून पोलिसांनी तपासाला सुरुवात केली. घटनास्थळी रक्ताचे डागदेखील आढळून आले होते. मेळघाटचे आमदार राजकुमार पटेल यांनीदेखील सखोल चौकशीची मागणी केली होती. चौकशीनंतर मित्रानेच मोबाइल चोरीच्या घटनेतून शिवमची हत्या केल्याचे स्पष्ट झाले. या प्रकरणात गुन्हा दाखल करून एकाला ताब्यातही घेण्यात आले आहे. मुळात नाराच्या आश्रमशाळेत मेळघाट परिसरातील विद्यार्थी शिक्षणासाठी येतात. आश्रमशाळा व्यवस्थापनाकडूनही पटसंख्या कायम ठेवण्यासाठी मेळघाटातून विद्यार्थी आणण्यासाठी प्रयत्न करतात..मित्रच निघाला मारेकरी
कारंजा तालुक्यातील नारा येथील यादवराव केचे आश्रमशाळेतील विद्यार्थ्याचा मृत्यू मित्राच्या मारहाणीत झाल्याचे स्पष्ट झाले आहे. याप्रकरणात पोलिसांनी हत्येचा गुन्हा दाखल करीत एका अल्पवयीनाला ताब्यात घेतले आहे.
अशी घडली घटना…शिवम आणि मारेकरी हे दोघेही एकाच गावातील होते. मोबाइल चोरीवरून दोघांमध्ये वाद झाला. शिवम मोबाइल चोरीविषयी शिक्षकांना सांगणार ही भीती त्याच्या मनात निर्माण झाली. यातूनच वाद घालून त्याने शिवमला मारहाण करण्यास सुरुवात केली. यात फरशीवर पडून शिवम जखमी झाला. बेशुद्धही पडला. ही घटना दडविण्यासाठी मारेकऱ्याने त्याच्या अंगावर गाद्या टाकल्या. यातच गुदमरून शिवमचा मृत्यू झाला.
Users Today : 25