पुणे : क्रिकेट विश्वकरंडकाच्या अंतिम सामन्याला सुरुवात होण्यापूर्वी… भारतीय संघाला शुभेच्छा देण्यासाठी काढलेल्या रांगोळ्या… कर्णधार रोहित शर्माच्या चौकार-षटकारांच्या आतषबाजीनंतर होणारा जल्लोष… ‘भारत माता की जय’ अन् ‘गणपती बाप्पा मोरया’चा जयघोष…भारत आणि ऑस्ट्रेलिया यांच्यातील एकदिवसीय क्रिकेट विश्वकरंडकाचा अंतिम सामना रविवारी खेळला गेला. रस्त्यारस्त्यांवर भारतीय संघाची जर्सी घालून फिरणारे तरुण-तरुणी नजरेस पडत होते. जागोजागी केवळ या सामन्याबाबत चर्चा झडत होत्या. भारतीय संघ विश्वकरंडकावर तिसऱ्यांदा नाव नोंदवेल, या आत्मविश्वासात पुणेकरांनी सामन्याचा आनंद घेण्याची जय्यत तयारी केली होती.विविध संस्था, गणेश मंडळांनी चौकाचौकांत स्क्रीन लावून सामना पाहण्याची व्यवस्था केली होती. दुपारी उन्हात या पडद्यांवर सामने दिसण्यास काहीशी अडचण येत होती. तरीही क्रिकेटरसिकांनी गर्दी केली होती. शहरांतील प्रमुख रस्त्यांवर शुकशुकाट होता. सामन्याच्या सुरुवातीलाच शुभमन गिल बाद झाल्यानंतर रसिकांमध्ये शांतता जाणवत होती. कर्णधार रोहित शर्माच्या चौकार-षटकारांना चौकाचौकांमध्ये वाद्यांच्या दणदणाटात दाद देण्यात येत होती.ऑस्ट्रेलियाचे पहिले तीन फलंदाज बाद झाल्यानंतर पुणेकरांनी जोरदार जल्लोष सुरू होकेला. मात्र, त्यानंतर फलंदाजांनी चिवट खेळी करून खेळपट्टीवर ठाण मांडल्याने पुणेकरांचा उत्साह मावळण्यास सुरुवात झाली. शेवटच्या अर्ध्या तासापर्यंत काहीतरी चमत्कार होईल आणि भारतीय संघ हा सामना जिंकेल, अशा दुर्दम्य आशावादात चौकाचौकांमध्ये चर्चा झडत होत्या. भारताने अंतिम सामना जिंकला असता, तर प्रमुख रस्ते उत्साही पुणेकरांच्या गर्दीने ओसंडून वाहिले असते. मात्र, पराभवामुळे रस्त्यांनी शांततेची ‘वाट’ अनुभवली.
सामना पाहण्यासाठी चौकाचौकांत लावलेल्या स्क्रीन एकीकडे…आणि तोंडाशी आलेला घास जात असल्याचे लक्षात आल्यानंतर मुख्य रस्त्यांवरील शुकशुकाट… भारतीय गोलंदाजांच्या हाताला यश येण्यासाठी देवाला जोडले गेलेले हात आणि ऑस्ट्रेलियाने विजयी धाव घेतल्यानंतर झालेला हिरमोड… अशा संमिश्र भावना पुणेकरांनी रविवारी अनुभवल्या.
Users Today : 16