लढा राष्ट्रहिताचा, संकल्प शुद्ध राजकारणाचा; अपक्ष उमेदवार शांतिगिरींची मतदारांना साद

नाशिक : ‘बाबाजी गावात येणार म्हणून सकाळपासूनच देवळाली कॅम्पमधील कार्यकर्ते-भाविकांची लगबग सुरू होती. वेळ सकाळी आठची. देवळाली कॅम्प गावात अपक्ष उमेदवार शांतिगिरी महाराजांचा ताफा दाखल झाला. बाबाजींच्या ट्रॅक्टरमागे स्वयंस्फूर्तीने निघालेल्या गाड्यांच्या संख्येतही वाढच होत गेली. शिंगव्यापर्यंत पोहोचताना ताफ्याला रॅलीचे स्वरूप कधी आले कळलेही नाही. ट्रॅक्टरवर बनविलेल्या व्यासपीठावर बाबाजी पोत्याच्या आसनावर विराजमान होऊन मतदारांना हात जोडून एकीकडे भावनिक साद घालत होते, तर दुसरीकडे ट्रॅक्टरजवळ येणाऱ्या नागरिकांच्या हाती बादलीतून मूठभर खडीसाखर अन् शेंगदाण्याचा प्रसाद देऊन स्मितहास्य करीत होते.

शिंगवे गावामध्ये रॅली पोहोचली तेव्हा सोबतच्या कार्यकर्त्यांनी गावाच्या प्रत्येक उंबरठ्यावर संपर्क साधून बाबाजींना कौल देण्याची विनंती केली. प्रचार साहित्याच्या वाटपासोबतच गावात स्टिकर्स चिकटविणे, ग्रामदेवतेस बाबाजींच्या वतीने फुलांच्या माळा आणि फळे अर्पण करून साकडे घालण्याचा क्रम त्यांनी प्रचारमार्गावरील सर्व गावांत अखंडित ठेवला. ही रॅली मार्गावरील एखाद्या मंदिराशिवाय इतर कुठेही थांबली नाही. रॅलीमार्गावर कुठेही भाषण नाही, आश्वासने नाहीत किंवा चौकसभादेखील नाहीत. केवळ ट्रॅक्टर किंवा बदल म्हणून काही वेळाने चारचाकीमध्ये बसून रस्त्याच्या दुतर्फा उभ्या असलेल्या नागरिकांना हात जोडून भावनिक साद घालणे हाच शिरस्ता शांतिगिरी महाराजांच्या प्रचार रॅलीने जपला आहे. चालू गाडीमध्ये ऑनलाइन माध्यमातून दू:रस्थ बैठकींनाही शांतिगिरी महाराज हजेरी लावून सहकार्य करण्याची साद घालतात.सकाळी आठच्या सुमारास निघालेली ही रॅली देवळाली कॅम्प, विठ्ठलवाडी, शिंगवे, वडनेर दुमाला, पिंपळगाव खांब, दाढेगाव, पाथर्डी गाव, अंबड, सातपूर, चाणशी, मातोरी, दरी, मुंगसरे, दुगाव, गिरणारे, वाडगाव करंदवाडी ही गावे करीत गोवर्धनमध्ये रात्री आठला विसावली.

रॅलीदरम्यान घरोघरी जाणारे कार्यकर्ते मतदारांना काही प्रश्न विचारत होते. “तुम्हाला स्वार्थी खासदार हवा की नि:स्वार्थी खासदार, तुम्हाला तुमचा मालक हवा की सेवक, तुम्हाला पैसे-दारू देणारे हवेत की सत्पात्री मतदान तुम्ही द्याल, घडविणारे हवेत की बिघडविणारे, तुम्हाला दादागिरी हवे की शांतिगिरी अशा रॅपिड फायर प्रश्नांद्वारे मतदारांचे मत जिंकू पाहणाऱ्या कार्यकर्त्यांच्या जेवणाची वेळ झाली तेव्हा आसपास कुठलेही हॉटेल नव्हते की कुठलाही ढाबा. शांतिगिरींच्या भक्त परिवारातील भाविकाच्या ओसरीतच कार्यकर्त्यांची पंगत बसते. सकाळी घरातून बाहेर पडताना स्वत:सोबतच आणखी एका कार्यकर्त्याचा डबा व पाण्याची बाटली प्रचारासाठी येणाऱ्या प्रत्येक भाविकाने सोबत घेतलेली असते. ट्रॅक्टरमागे निघालेला ताफा न कोणत्या पेट्रोलपंपावर थांबतो न कुणाचे स्वागतसत्कार स्वीकारतो. भाविक कार्यकर्ते स्वखर्चाने डिझेल-पेट्रोल वाहनात भरून स्वयंस्फूर्तीने प्रचारात सहभागी होतात. बाबाजींसाठी दिवसभरात १५०० पेक्षा अधिक कार्यकर्ते रोज प्रचार मैदानात आहेत. यात महिलांचाही विशेषत्वाने सहभाग आहे. गावामध्ये कुठल्याही प्रकारची घोषणा कार्यकर्त्यांकडून दिली जात नाही.पोत्याचे आसन अन् फळांचा आहारअपक्ष उमेदवार शांतिगिरी महाराज यांचा दिनक्रम पहाटे साडेतीनला सुरू होतो. पहाटे ४ ते ४.४५ ध्यान-योगासने व प्राणायाम झाल्यानंतर पाचला सद्गुरूंकडून प्राप्त दीक्षाविधीनुसार सांप्रदायिक नित्यविधी पूजन होते. यानंतर सत्संग आणि आरती पार पडेपर्यंत सकाळचे सात वाजतात. सकाळी सातला वैयक्तिक पूजन होऊन फलाहार होताच आठच्या सुमारास प्रचारार्थ कधी पदयात्रा, कधी चारचाकी, तर कधी ट्रॅक्टरवर बसून संपर्क सुरू होतो. या रॅलीदरम्यान संपर्कासाठी ऑनलाइन माध्यमे व सोशल मीडियाचाही उपयोग शांतिगिरी करतात. ट्रॅक्टर असो किंवा फोरव्हीलर, पण आसन म्हणून शांतिगरी बसण्यासाठी पोत्यांचा वापर करतात अन् गेल्या ४५ वर्षांपासून ते केवळ फलाहारावर आहेत, ही निरीक्षणेही बाबाजींच्या भक्तपरिवारात आकर्षणकेंद्र ठरतात.

ग्रामदेवतेचा राखतात मान