धुळे छत्रपती संभाजीनगर येथील अहमदनगर रोडवरील लिंबेजळगाव परिसरातील टोलनाक्याजवळ काल एक भीषण अपघात झाला. ड्रंक अँड ड्राइव्हमुळे हा अपघात झाला. मद्यधुंद अवस्थेत असलेल्या चालकाने आपल्या स्कॉर्पिओ गाडीने धडक दिल्याने एकाच कुटुंबातील चार जणांचा मृत्यू झाल्याची घटना घडली. यामध्ये दीड महिन्यांच्या बाळासह आई, आजी आणि सात वर्षांच्या चिमुकलीला आपला जीव गमवावा लागला. या अपघाताला एक दिवस उलटत नाही तोवर धुळे जिल्ह्यात पुन्हा एक भीषण अपघात झाला आहे.धुळे जिल्ह्यातील शिंदखेडा तालुक्यातील दसवेल फाट्याजवळ भीषण अपघात झाला आहे. पिकअप व्हॅन आणि ईको गाडीत समोरासमोर जोरदार धडक झाल्यामुळे हा भीषण अपघात झाला आहे. या अपघातात पाच जणांचा जागीच मृत्यू झाला आहे. मयतांमध्ये तीन महिलांचा समावेश आहे. दरम्यान, नागरिकांनी जखमींना तातडीने धुळ्यातील हिरे रुग्णालयात उपचारासाठी दाखल केले आहे.
पिकअप अन् ईकोची जोरदार धडक, वाहनांचा अक्षरश: चक्काचूर, भीषण अपघात पाच जणांचा जागीच मृत्यू
