नाशिक : महसूल विभागामार्फत राज्य ई-पीकपाहणी या प्रकल्पाद्वारे शेतकऱ्यांना आपला पीकपेरा स्वतः नोंदविण्याची सुविधा उपलब्ध करून देण्यात आलेली आहे. या नोंदणीची मुदत रविवार (दि. १५ सप्टेंबर) पर्यंत होती. मात्र, अद्यापही काही शेतकऱ्यांनी ई-पीकपाहणी ॲपद्वारे पीकपेरा नोंदविला नसल्याने शेतकऱ्यांना नोंदणीसाठी २३ सप्टेंबरपर्यंत मुदतवाढ देण्यात आली आहे, अशी माहिती विभागीय आयुक्त डॉ. प्रवीण गेडाम यांनी दिली. नाशिक विभागातील सर्व शेतकऱ्यांनी खरीप हंगामात केलेल्या पिकांची नोंद ई-पीकपाहणी ॲपद्वारे पूर्ण करावी, असे आवाहनही त्यांनी केले आहे.
खरीप हंगाम २०२४-२५ करिता शेतकरी स्तरावरील पीकपाहणी नोंदवण्यासाठी महसूल दिनापासून (दि. १ ऑगस्ट, २०२४) सुरुवात झाली. दि. १५ सप्टेंबरपर्यंत शेतकरी स्तरावरील पीकपाहणी करता येणार होती. परंतु, राज्यात बहुतेक ठिकाणी मुसळधार पावसामुळे शेतकरी स्तरावरील ई-पीकपाहणी विहीत मुदतीत पूर्ण झाली नसल्याचे निदर्शनास आल्याने राज्य शासनाने शेतकरी स्तरावरील या नोंदणीसाठी २३ सप्टेंबरपर्यंत मुदतवाढ देण्यात आली आहे.
साडेपंधरा लाख हेक्टवर पाहणी
खरीप हंगाम २०२४-२५ मध्ये दि. १३ सप्टेंबरपर्यंत नाशिक विभागात १५ लाख ४८ हजार ६२२ हेक्टर इतक्या क्षेत्रावरील ई-पीकपाहणी पूर्ण झाली आहे. तर जवळपास १६ लाख ४७ हजार ५६ हेक्टर क्षेत्रावर पीकपाहणी नोंदविण्यात आलेली नाही. राज्य शासनाने ‘माझी शेती माझा सातबारा, मीच नोंदवणार माझा पीकपेरा’च्या उद्देशाने स्वतःच्या शेताची पीकपाहणी स्वतः करण्याची संधी ई-पीकपाहणी ॲपद्वारे राज्यातील सर्व शेतकऱ्यांना उपलब्ध करून दिले आहे. पीकविमा, नैसर्गिक आपत्तीचे पंचनामे तसेच भूसंपादन इ. करिता ई-पीकपाहणी ॲपद्वारे शेतकऱ्यांनी पीकपाहणी नोंदविणे अत्यंत आवश्यक आहे, असे आवाहनही विभागीय आयुक्त डॉ. गेडाम यांनी केले आहे.
इंटरनेटशिवाय पीकपाहणी
ई-पीकपाहणी करण्यामध्ये काही समस्या असल्यास (०२०) २५७१२७१२ या हेल्पलाइन क्रमांकावर संपर्क करून मदत घेता येऊ शकते. इंटरनेटची आवश्यकता फक्त शेतकरी नोंदणी वा पीकपाहणी अपलोड करण्याकामी आवश्यक आहे. त्यामुळे ज्या शेतामध्ये इंटरनेट सुविधा नाही, त्याठिकाणी सुद्धा पीकपाहणी करता येते.
सहाय्यक, तलाठी स्तरावरील पीकपाहणी नोंदविण्यासाठी देखील सात दिवसांची मुदतवाढ देण्यात आली आहे. आता दि.२४ सप्टेंबर ते २३ नोव्हेंबर, २०२४ या कालावधीत सहाय्यक, तलाठी पीकपाहणी नोंदवू शकणार आहेत.
Users Today : 18