नाशिक : महापालिकेच्या आरोग्य विभागात नोकरभरती होत असल्याचा बनावट आदेश तयार करून तो सोशल मीडियावर फिरल्यानंतर आता चक्क आयुक्त डॉ. अशोक करंजकर यांच्या स्वाक्षरीचा नगरसचिव विभागाचा चार कोटींच्या कामांचा बनावट ठराव समोर आला आहे. जिल्हाधिकारी कार्यालयातील नगरपालिका शाखेतील कर्मचाऱ्यांच्या दक्षतेमुळे ही बनवाबनवी समोर आली.
नगरसचिव विभागाकडून नगरपालिका शाखेकडे कार्यवाहीसाठी पाठविण्यात येत असलेल्या ठरावाची कॉपी संबंधितास जमली नसल्यामुळे हा प्रकार उघड झाला आहे. दरम्यान, या प्रकारात महापालिकेसह जिल्हाधिकारी कार्यालयाची फसवणूक करण्याचा प्रयत्न होत असतानाही गुन्हा दाखल करण्याबाबत दोन्ही यंत्रणांमध्ये टोलवाटोलवी होत असल्याने आश्चर्य व्यक्त केले जात आहे.
काय आहे प्रकरण?
प्रशासकीय राजवटीत नाशिक महापालिकेचा कारभार चांगलाच भरकटला असून, यंत्रणेवर आयुक्तांचे नियंत्रण नसल्याचे चित्र आहे. त्यामुळे या परिस्थितीचा फायदा आता समाजकंटक घेताना दिसत आहेत. महापालिकेच्या आरोग्य विभागात नोकरभरती होत असल्याचा बनावट आदेश तयार करून ते सोशल मीडियावर फिरल्याचा प्रकार बुधवारी (दि. १८) उघडकीस आला होता. जिल्हा रुग्णालयातील कर्मचाऱ्यांच्या दक्षतेमुळे बेरोजगारांची फसवणूक टळली होती. त्यानंतर गुरुवारी (दि. १९) समाजकंटकांनी पुढले पाऊल टाकत, महापालिकेचा बनावट ठराव तयार करून तो जिल्हाधिकारी कार्यालयात सादर केल्याने खळबळ उडाली आहे. शहरात आमदार, खासदार निधीतील कामे करण्यासाठी जिल्हाधिकारी कार्यालयाची मंजुरी आवश्यक आहे. संबंधित कामांसदर्भात महापालिकेत प्रस्ताव आल्यानंतर त्या संदर्भातील ठराव मंजूर करून तो पुढील कार्यवाहीसाठी नगरसचिव जिल्हाधिकारी विभागाकडून कार्यालयातील नगरपालिका शाखेत पाठवला जातो. त्यानुसार महापालिकेकडून नगरपालिका शाखेत आलेल्या चार कोटींच्या कामांच्या ठरावाबाबत नगरपालिका शाखेतील लिपिकांना संशय आला. त्याबाबत पडताळणी केली असता हा ठराव बनावट असल्याचे समोर आल्याने खळबळ उडाली आहे.
ठरावावर आयुक्तांच्या बनावट स्वाक्षऱ्या
या ठरावावर आयुक्त डॉ. करंजकर यांच्यासह नगरसचिव मदन हरिश्चंद्र यांच्या बनावट स्वाक्षऱ्या करण्यात आल्या आहेत.गुन्ह्याबाबत टोलवाटोलवी या ठरावामागे कोणी तरी ठेकेदारच असल्याचा महापालिकेचा, तसेच जिल्हाधिकारी कार्यालयातील लिपिकांचा संशय आहे. या ठरावातून महापालिकेसह जिल्हाधिकारी कार्यालयाची फसवणूक करण्याचा प्रयत्न असतानाही, दोन्ही यंत्रणांकडून मात्र याबाबत टोलवाटोलवी केली जात आहे. हा ठराव जिल्हाधिकारी कार्यालयात सादर केल्याने जिल्हाधिकारी कार्यालयानेच याबाबत पोलिसात तक्रार द्यायला हवी, अशी भूमिका घेतली आहे. जिल्हाधिकारी कार्यालयाने मात्र या ठरावाबाबत हात झटकले आहेत. त्यामुळे एवढ्या गंभीर फसवणुकीतही महापालिकेडून हात झटकले जात असल्याने आश्चर्य व्यक्त केले जात आहे.
असा उघडकीस आला प्रकार
नगरसचिव विभागातर्फे चार कोटींच्या कामांचा महासभेचा ठराव क्र. ८९ हा पुढील कार्यवाहीसाठी नगरपालिका शाखेत पाठविण्यात आला होता. त्यात चार कामांसाठी प्रत्येकी ९९ लाख ९५ हजारांचे एकूण तीन कोटी ९९ लाखांचे ठराव होते. मात्र, या ठरावातील शासकीय भाषेत त्रुटी असल्याचे नगरपालिका शाखेतील लिपिकांच्या लक्षात आले. त्यामुळे त्यांनी तपासणीसाठी महापालिकेच्या नगरसचिव विभागाशी संपर्क साधला. नगरसचिव विभागाने याबाबतची तपासणी केली असता, ठराव क्र. ८९ हा दुसऱ्याच कामांसाठी असल्याचे समोर आले. त्यामुळे हा ठराव बनावट आल्याचे लक्षात आल्यानंतर नगरसचिव विभागाने तो आयुक्त डॉ. करंजकर यांच्याकडे पाठवला. त्यानंतर करजंकर यांनी तोंडी माहितीच्या आधारावर नगरसचिव मदन हरिश्चंद्र यांना पुढील कार्यवाही करण्याचे निर्देश दिले आहेत.
आरोग्य विभागाचाही बनावट नोकरभरती आदेश महापालिकेच्या आरोग्य विभागात नोकरभरती होत असल्याचा बनावट आदेश तयार करून तो सोशल मीडियावर व्हायरल झाल्याचा प्रकार बुधवारी (दि. १८) समोर आला आहे. विशेष म्हणजे महापालिकेतील पदासाठी भरती असताना, उमेदवारांना जिल्हा रुग्णालयात बोलविण्यात आल्याने बुधवारी जिल्हा रुग्णालयात व महापालिकेत इच्छुकांनी लोकप्रतिनिधींमार्फत धडक दिल्याने खळबळ उडाली होती. महापालिकेचे आयुक्त डॉ. अशोक करंजकर व वैद्यकीय अधीक्षक डॉ. तानाजी चव्हाण असताना या आदेशात आयुक्त कैलास जाधव, तर पशुवैद्यकीय अधिकारी डॉ. प्रमोद सोनवणे यांच्या नावाने हा आदेश प्रसिद्ध करण्यात आल्याने तो बनावट असल्याचे समोर आले. महापालिकेने अशी कोणतीही भरती नसल्याचे स्पष्ट केले आहे. जिल्हा रुग्णालय व महापालिकेच्या सतर्कतेमुळे इच्छुकांची फसवणूक टळली आहे. त्यामुळे डॉ. सोनवणे यांनी तक्रार दाखल केली आहे.