📰 स्वातंत्र्याच्या ७९ वर्षानंतरही मेहकर तालुका तहानलेलाच!

📍 मेहकर : प्रतिनिधी (दि. ८ एप्रिल)

मेहकर तालुक्यात पाणीटंचाईची समस्या दिवसेंदिवस गंभीर होत असून, स्वातंत्र्याच्या ७९ वर्षांनंतरही अनेक गावे शाश्वत पिण्याच्या पाण्यापासून वंचित असल्याचे चित्र आहे. शासनाच्या विविध योजनांवर कोट्यवधी रुपये खर्च करूनही ग्रामीण भागात पाण्याची टंचाई कायम आहे.

सध्या उन्हाळ्याची तीव्रता वाढल्याने तालुक्यातील अनेक गावांमध्ये पाण्यासाठी नागरिकांना मोठ्या हालअपेष्टा सहन कराव्या लागत आहेत. परिस्थिती हाताळण्यासाठी प्रशासनाने २५ गावांतील विहिरी अधिग्रहित केल्या आहेत. यामध्ये शेंदला, पांगरखेड, वरदडा, मोहखेड, हिवरखेड, माळखेड, खामखेड, अकोला ठाकरे, साबरा, नांद्रा, चायगाव, परतापूर, सुळा, बोरी, वडाळी, वरवंड, लोणी गवळी, रत्नापूर, सुकळी, लोणी काळे, बारडा, लावणा, पारखेड, हिवरा साबळे आणि निंबा या गावांचा समावेश आहे.

याशिवाय वडाळी, वरवंड, लोणी गवळी, हिवरा साबळे आणि निंबा या पाच गावांना सध्या टँकरद्वारे पाणीपुरवठा करण्यात येत आहे. तसेच बोथा आणि पार्टी या गावांसाठी टँकर प्रस्ताव सादर करण्यात आले आहेत.

दरम्यान, अधिग्रहित विहिरींच्या मोबदल्यापोटी शासनाकडे मोठी रक्कम थकीत आहे. सन २०२२-२३ मधील ८ लाख ९० हजार रुपये, सन २०२३-२४ मधील ४४ लाख १२ हजार ४०० रुपये आणि सन २०२४-२५ मधील २१ लाख ७१ हजार २०० रुपये, असे एकूण ७४ लाख ७३ हजार ६०० रुपये अद्याप देणे बाकी आहे.

शासनाकडून मोबदला वेळेत न मिळाल्याने शेतकऱ्यांमध्ये नाराजीचे वातावरण असून, भविष्यात विहिरी अधिग्रहित करण्यासाठी शेतकरी पुढे येतील का, असा प्रश्न उपस्थित होत आहे. त्यामुळे पाणीपुरवठा व्यवस्थेतील त्रुटी दूर करून शाश्वत उपाययोजना राबवण्याची गरज व्यक्त होत आहे.