मुंबई –
ई-कॉमर्स क्षेत्रातील आघाडीची कंपनी Meesho च्या शेअरने गुरुवारी बाजारात जोरदार कामगिरी करत गुंतवणूकदारांचे लक्ष वेधून घेतले. एका दिवसात सुमारे १४ टक्क्यांची उसळी घेत या शेअरने बाजारात धडाकेबाज प्रदर्शन केले.
गुरुवारच्या व्यापारी सत्रात ट्रेडिंग सुरू झाल्यानंतर अवघ्या ९० मिनिटांतच सुमारे ३.४ कोटी शेअर्सची खरेदी-विक्री झाली. सामान्य व्यवहाराच्या तुलनेत ही संख्या अनेक पटींनी अधिक असल्याने बाजारात या शेअरची मोठी चर्चा रंगली.
मीशोचा शेअर सध्या त्याच्या इश्यू प्राईस १११ रुपयांच्या तुलनेत सुमारे ५५ टक्क्यांनी अधिक दरावर व्यवहार करत आहे. दिवसभरात या स्टॉकमध्ये सातत्याने खरेदीचा कल दिसून आला. दिवसाअखेरीस शेअर सुमारे ८.४६ टक्क्यांच्या वाढीसह १६५.६४ रुपयांवर पोहोचला.
डिसेंबर २०२५ मध्ये बाजारात सूचीबद्ध झाल्यानंतर कंपनीने गुंतवणूकदारांना चांगला परतावा दिला आहे. लिस्टिंगच्या पहिल्याच दिवशी शेअरने तब्बल ५३ टक्क्यांची उसळी घेतली होती. त्यानंतरही कंपनीने बाजारात आपली पकड मजबूत ठेवली आहे.
दरम्यान, आखाती भागातील तणाव काहीसा कमी झाल्याने शेअर बाजारात सकारात्मक वातावरण निर्माण झाले आहे. त्याचा फायदा मीशोसारख्या वाढत्या कंपन्यांना होत असल्याचे तज्ज्ञांचे मत आहे.
गुंतवणूक संस्थांकडून या शेअरबाबत मिश्र प्रतिक्रिया समोर येत आहेत. काही संस्था खरेदीचा सल्ला देत असताना, काहींनी ‘वेट अँड वॉच’ भूमिका घेतली आहे. तर काही तज्ज्ञांनी सध्याची गुंतवणूक कायम ठेवण्याचा सल्ला दिला आहे.
आगामी काळात या शेअरमध्ये चढ-उतार सुरू राहण्याची शक्यता व्यक्त केली जात असून, गुंतवणूकदारांनी सावध भूमिका घेण्याची गरज व्यक्त केली जात आहे.
Users Today : 5