मेहकर
मेहकर-लोणार मतदारसंघासह बुलढाणा, वाशिम, अकोला व जालना जिल्ह्यात निर्माण झालेल्या पेट्रोल-डिझेल टंचाईच्या पार्श्वभूमीवर आमदार Siddharth Kharat यांनी थेट मंत्रालयात धाव घेत राज्य सरकारकडे तातडीच्या उपाययोजनांची मागणी केली. यावर सरकारकडून सकारात्मक प्रतिसाद मिळाल्याची माहिती त्यांनी दिली आहे.
शेतकऱ्यांना शेतीकामांसाठी आवश्यक डिझेल उपलब्ध करून देण्याचे आश्वासन प्रशासनाकडून देण्यात आले आहे.
## मंत्रालयात वरिष्ठ अधिकाऱ्यांशी चर्चा
आ. खरात यांनी अन्न व नागरी पुरवठामंत्री छगन भुजबळ, मुख्य सचिव राजेश अग्रवाल, अप्पर मुख्य सचिव अनिल डिग्गीकर, रेशनिंग आयुक्त चंद्रकांत डांगे तसेच पेट्रोलियम व नैसर्गिक वायू विभागाच्या अधिकाऱ्यांची मंत्रालयात भेट घेऊन जिल्ह्यातील परिस्थिती मांडली.
## शेतकऱ्यांसाठी विशेष व्यवस्था
खरीप पेरणीच्या पार्श्वभूमीवर नांगरणी, वखरणी, रोटाव्हेटर आणि इतर शेतीकामांसाठी मोठ्या प्रमाणावर डिझेलची गरज असते. मात्र पेट्रोल पंपांवर कॅनद्वारे डिझेल देण्यावरील निर्बंधांमुळे शेतकऱ्यांना अडचणी येत असल्याचे त्यांनी निदर्शनास आणून दिले.
शेतकऱ्यांना ट्रॅक्टरच्या आरसी बुक किंवा फार्मर आयडीच्या आधारे ठरावीक पेट्रोल पंपांवरून २० ते ३० लिटर डिझेल उपलब्ध करून देण्याची मागणीही त्यांनी केली.
## प्रशासनाकडून सकारात्मक प्रतिसाद
या मागणीवर संबंधित अधिकाऱ्यांनी सकारात्मक भूमिका घेत जिल्हाधिकाऱ्यांना आवश्यक उपाययोजना करण्याच्या सूचना दिल्या आहेत. त्यामुळे शेतकऱ्यांना दिलासा मिळण्याची शक्यता निर्माण झाली आहे.