नवाब मलिक लेटरबॉम्बनंतर भाजपचं संपूर्ण कॅडर फडणवीसांच्या पाठीशी ठामपणे उभं: चंद्रशेखर बावनकुळे

भाजपचे प्रदेशाध्यक्ष बावनकुळे म्हणाले,‘इतर प्रकरणात केलेले आरोप आणि देशद्रोहासंदर्भात न्यायालयाने घेतलेली मलिक यांच्यासंदर्भातील भूमिका पाहता हे पत्र जाहीरपणे समोर आले. याचे भाजपा समर्थन करीत आहे. मलिक यांना याच आरोपावरून जेलमध्ये जावे लागले होते. सध्या ते वैद्यकीय जामीनावर असले तरी ते पूर्णत: आरोपमुक्त झालेले नाहीत. न्यायालयाने त्यांना आरोपमुक्त केले तर त्यांना सत्तेत घेण्यास भाजपचा विरोध असणार नाही. देशहिताच्या मुद्द्यावर महायुती तडजोड करणार नाही. अजित पवार प्रगल्भ नेते आहेत. ते फडणवीस आणि १४ कोटी जनतेच्या भावनांचा आदर करतील, अशी अपेक्षा आहे.’

आमचे लक्ष्य ५१ टक्के जागा

शिंदे गटाने ठाण्यात एका जागेवर दावा ठोकला आहे, या पार्श्वभूमीवर बोलताना बावनकुळे म्हणाले,‘जो पक्ष यापूर्वी ज्या जागेवरून जिंकला आहे ती जागा त्यांचीच आहे. पण, त्याशिवाय कोण कुठून लढणार याबाबतचा निर्णय केंद्रीय नेतृत्व घेणार आहे. भाजप आणि इतर सर्व सहकारी पक्ष मिळून तयार झालेल्या महायुतीचे लक्ष्य ५१ टक्के जागा जिंकण्याचे आहे. त्यामध्ये आमची गरज पडल्यास आम्ही सहयोगी पक्षांना मदत करू. जिथे आम्हाला सहयोगी पक्षांची मदत लागेल तिथे ते करतील. अद्याप कुठल्याही स्वरूपाचे जागावाटप झालेले नाही.’

कांदा निर्यातबंदीवर लवकरच निर्णय

कांदा निर्यातबंदी संदर्भात केंद्रीय मंत्री भारती पवार आणि पीयूष गोयल यांच्याशी चर्चा झाली आहे. ते सकारात्मक आहेत. लवकरच या मुद्द्यावर तोडगा निघेल, असे सुतोवाचही बावनकुळे यांनी केले.