‘डीपीडीसी’चा निधी दादांनी आपल्याच पदाधिकाऱ्यांचा दिल्याचा आरोप, प्रश्न विचारताच चंद्रकांत पाटलांनी हात जोडले

पुणे जिल्हा नियोजन समितीचा निधी उपमुख्यमंत्री आणि पुणे जिल्ह्याचे पालकमंत्री अजित पवार यांनी भाजप आणि शिंदे गटाच्या कार्यकर्त्यांना डावलून आपल्या पदाधिकाऱ्यांना दिल्याचा गंभीर आरोप जिल्हा नियोजन समितीतील भाजप शिंदे गटाच्या दहा सदस्यांनी केला आहे. त्यामुळे पुण्यात अजित पवार गटविरुद्ध भाजप शिंदे गट असा नवा संघर्ष सुरू झाला आहे. मात्र या वादावर पुण्याचे माजी पालकमंत्री आणि भाजप नेते चंद्रकांत पाटील यांनी बोलण्यास नकार दिला आहे.
आज चंद्रकांत पाटील यांच्या अध्यक्षतेखाली पुण्यात भाजपच्या मंडल अधिकाऱ्यांची एक बैठक होत आहे. या बैठकीला चंद्रकांत पाटील आले असता त्यांना जिल्हा नियोजन समितीच्या निधी संदर्भात भाजपच्या सदस्यांनी केलेल्या आरोपावर प्रश्न विचारला असता चंद्रकांत पाटील यांनी हात जोडत तुमच्या पासून लांब राहायला हवं, असं म्हणत या वादावर बोलणं टाळलं आहे. मात्र आज मंडल अधिकाऱ्यांच्या होणाऱ्या बैठकीत भाजपचे पदाधिकारी अजित पवार यांची तक्रार चंद्रकांत पाटील यांच्याकडे करणार असल्याची माहिती आहे. त्यामुळे पुणे जिल्ह्याच्या आजी आणि माजी पालकमंत्र्यांच्या वादाचा नवा अंक जिल्हा नियोजन समितीच्या निधी वाटपावरून होणार असल्याचे चित्र आहे.भाजप- शिंदे गटाच्या दहा सदस्यांनी जिल्हाधिकारी यांना एक निवेदन देऊन या संदर्भाचा गंभीर आरोप केला आहे. पालकमंत्री अजित पवार यांनी भाजप शिंदे गटाला डावलून राष्ट्रवादीच्या पदाधिकाऱ्यांना आणि आपल्या समर्थकांना जवळपास ८०० कोटी रुपयांचा निधी वितरित केला आहे. ही कामे तात्काळ थांबावेत अन्यथा आम्ही न्यायालयात जाऊ असा गंभीर इशारा या पदाधिकाऱ्यांनी दिला आहे.दरम्यान, एकूण निधीपैकी ६० ते ७० टक्के निधी अजित पवारांनी आपल्या समर्थकांनाच दिल्याचा आरोप करत शिंदे गट भाजपच्या पदाधिकाऱ्यांची केवळ पाच ते दहा टक्क्यांवर बोलवण करण्यात आल्याच देखील आरोप या पदाधिकाऱ्यांनी केला आहे. त्याचबरोबर आपत्ती व्यवस्थापनाचा निधी जिल्ह्यात कुठलीही आपत्ती नसताना वापरण्यात आल्याचा आरोप देखील या निवेदनातून करण्यात आला आहे.