संतोष शिराळे, सातारा: वाई तालुक्यातील विरमाडे येथील इंडो तिबेट बॉर्डर पोलीस दलातील जवान विजय श्रीरंग सोनावणे (वय ३६) यांचे आनेवाडी टोलनाक्याजवळ अपघाती निधन झाले आहे. गणपती विसर्जन मिरवणुकीनंतर विरमाडे येथून सातारा येथील घरी जात असताना हा अपघात झाल्याची माहिती आहे. विरमाडे ते आनेवाडीदरम्यान टोलनाक्याजवळ उभ्या असलेल्या वाहनाला पाठीमागून धडक दिली. या अपघातात जवान विजय हे गंभीर जखमी झाले. त्यानंतर सातारा येथील रुग्णालयात उपचार सुरू असताना त्यांचा दुर्दैवी मृत्यू झाला.
सुट्टीवर असताना जवानासोबत अनर्थ घडला
याबाबत मिळालेली माहिती अशी, इंडियन तिबेट पोलीस दलात कार्यरत असणारे विरमाडे येथील विजय सोनावणे हे सध्या सुट्टीवर आले होते. साताऱ्यातील तामजाईनगर परिसरातील श्रीनगरी सोसायटीत ते आपल्या कुटुंबीयांसोबत वास्तव्यास होते. मंगळवारी ते आपल्या मूळ गावी विरमाडे येथे गेले होते. विरमाडे येथील सार्वजनिक मंडळाच्या गणपतीची मंगळवारी विसर्जन मिरवणूक असल्याने ते रात्री उशिरापर्यंत मिरवणूक पाहण्यासाठी थांबले होते. रात्री उशिरा ते पुन्हा आपल्या दुचाकीवरून (बुलेट) सातारला निघाले होते.
ट्रकला जवानाच्या दुचाकीची धडक
- महामार्गावर आनेवाडी टोलनाक्यावर आले असता अंधारामुळे महामार्गावर उभा असलेला ट्रक त्यांच्या निदर्शनास न आल्याने त्यांची दुचाकी ट्रकला पाठीमागून जोरदार धडकली. या धडकेत बुलटेचे मोठ्या प्रमाणात नुकसान झाले आहे. तसेच सोनावणे यांच्या डोक्याला गंभीर दुखापत झाल्याने ते महामार्गावर बेशुद्ध अवस्थेत पडले होते. अपघातानंतर तात्काळ अपघातस्थळी उपस्थित असलेल्या विरमाडे येथील तरुणांनी त्यांना सातारा येथील यशवंत हॉस्पिटलमध्ये उपचारासाठी दाखल केले. मात्र, जास्त रक्तस्त्राव झाल्याने उपचारादरम्यान त्यांचा मृत्यू झाला.जवान विजय सोनावणे यांच्या पश्चात आई, वडील, पत्नी, मुलगा, मुलगी, दोन बहिणी असा परिवार आहे. गेल्या १७ वर्षांपासून ते देशसेवा करीत होते. जवानाच्या निधनाची माहिती मिळताच शासकीय पातळीवर सर्व यंत्रणा सतर्क झाल्या आहेत. सोनवणे यांच्यावर शासकीय इतमामात शुक्रवारी सकाळी अंत्यसंस्कार होणार असल्याची माहिती सहाय्यक पोलीस निरीक्षक रमेश गर्जे यांनी दिली.