नागपूर : संविधान निर्माते डॉ. बाबासाहेब आंबेडकर यांच्या महापरिनिर्वाणदिनानिमित्त अभिवादन करण्यासाठी मुंबई येथील चैत्यभूमीवर जाणाऱ्यांची सुविधा व्हावी यासाठी मध्य रेल्वेतर्फे १४ अनारक्षित विशेष रेल्वेगाड्या चालविण्यात येणार आहेत. नागपूर ते छत्रपती शिवाजी महाराज टर्मिनस (सीएसएमटी) मुंबईसाठी ३, सीएसएमटी-दादर ते सेवाग्राम- अजनी- नागपूरसाठी ६ आणि अजनी ते सीएसएमटी दरम्यान १ रेल्वेगाडी सोडण्यात येईल.
मुंबई-दादर ते सेवाग्राम- अजनी- नागपूर अनारक्षित ०१२४९ ही रेल्वेगाडी ६ डिसेंबर रोजी १६.४५ वाजता सीएसएमटी येथून सुटेल आणि अजनी येथे दुसऱ्या दिवशी ०९.३० वाजता पोहोचेल. ०१२५१ ही रेल्वेगाडी ६ डिसेंबर रोजी १८.३५ वाजता मुंबई येथून सुटेल आणि सेवाग्राम येथे दुसऱ्या दिवशी १०.३० वाजता पोहोचेल. ०१२५३ ही रेल्वेगाडी ७ डिसेंबर रोजी (६ आणि ७ डिसेंबरच्या मध्यरात्री) दादर येथून ००.४० वाजता सुटेल आणि अजनी येथे त्याच दिवशी १५.५५ वाजता पोहोचेल.०१२५५ ही रेल्वेगाडी ७ तारखेला १२.३५ वाजता मुंबईवरून निघेल व नागपूर येथे दुसऱ्या दिवशी ०३.०० वाजता पोहोचेल. ०१२५७ या क्रमांकाची रेल्वेगाडी ८ डिसेंबर रोजी १८.३५ वाजता मुंबई येथून सुटेल आणि नागपूर येथे दुसऱ्या दिवशी १२.१० वाजता पोहोचेल. ०१२५९ ही रेल्वेगाडी ८ डिसेंबर रोजी (७ आणि ८ डिसेंबरच्या मध्यरात्री) दादर येथून ००.४० सुटेल आणि अजनी येथे त्याच दिवशी १५.५५ वाजता पोहोचेल. या रेल्वेगाडीला दादर, कल्याण, कसारा, इगतपुरी, नाशिक रोड, मनमाड, चाळीसगाव, जळगाव, भुसावळ, मलकापूर, जलंब, अकोला, मूर्तिजापूर, बडनेरा, धामणगाव, पुलगाव, वर्धा, सेवाग्राम, अजनी आणि नागपूर येथे थांबे राहतील.
अजनी-मुंबई ०२०४० ही सुपरफास्ट रेल्वेगाडी अजनी येथून ७ डिसेंबर रोजी १३.३० वाजता सुटेल आणि सीएसएमटी येथे दुसऱ्या दिवशी ०४.१० वाजता पोहोचेल. या रेल्वेगाडीला वर्धा, पुलगाव, धामणगाव, बडनेरा, अकोला, शेगाव, मलकापूर, भुसावळ, नाशिक रोड, इगतपुरी, कल्याण, दादर येथे थांबे राहतील. प्रवासादरम्यान कोणतीही गैरसोय होऊ नये यासाठी प्रवाशांनी वैध तिकीट घेऊन प्रवास करावे, असे आवाहन रेल्वे प्रशासनाने केले आहे.
Users Today : 8