कुस्ती मैदानात जमदाडे विजयी

या मैदानाचे उद्‌घाटन संभूआप्पा-बुवाफन मठाचे मिलिंद मठकरी यांच्या हस्ते करण्यात आले. तसेच मानाची चांदीची गदा समाधिस्थळावरून वाजत-गाजत मैदानावर आणली. डबल महाराष्ट्र केसरी चंद्रहार पाटील, पोलिस निरीक्षक संजय हारगुडे, हणमंत पाटील-शिरटेकर, संजय पाटील-ढोबळे, गुलाबराव पाटील-शिरटेकर, राजाराम माळी, संग्रामसिंह जाधव यांची प्रमुख उपस्थिती होती.

प्रथम क्रमांकासाठी माऊली जमदाडे व गुरुप्रताप सिंग यांच्यातील कुस्ती ज्येष्ठ मल्ल हणमंतराव पाटील, भास्करराव मोरे यांच्या हस्ते लावली. दोन्हीही मल्ल समान ताकदीचे असल्याने कुस्ती शौकिनांची उत्कंठा शिगेला पोहोचली होती. गर्दनखेच आणि पंजा पकडीतून एकमेकांच्या ताकदीचा अंदाज घेतल्यानंतर डाव-प्रतिडावाला सुरवात झाली. माऊली जमदाडेने विसाव्या मिनिटाला आक्रमक होताना आपल्या उंची व ताकदीचा पुरेपूर वापर करत गुरुप्रताप सिंगला आपल्या अंगावरून मागे टाकत ‘बॅक थ्रो’ डावावर अस्मान दाखवले.