आजची धक्कादायक आणि संतापजनक बातमी येतेय बुलढाणा जिल्ह्यातून… जिथे एका शिक्षकानेच ‘गुरु’ या पवित्र नात्याला काळिमा फासला आहे.

 मेहकर : 

मेहकर तालुक्यातील लोणी गवळी येथील जिल्हा परिषद शाळेत एका शिक्षकाने अल्पवयीन विद्यार्थिनींशी गैरवर्तन केल्याची धक्कादायक घटना उघडकीस आली असून, यामुळे परिसरात तीव्र संताप व्यक्त केला जात आहे.

मिळालेल्या माहितीनुसार, संबंधित शिक्षकाने शाळेतील काही विद्यार्थिनींना एकांतात बोलावून त्यांच्याशी अयोग्य वर्तन केल्याचा आरोप आहे. हा प्रकार समोर आल्यानंतर पीडित मुलींनी आपल्या पालकांना माहिती दिली. त्यानंतर इतर विद्यार्थिनींनीही अशाच स्वरूपाचे अनुभव सांगितल्याने प्रकरण अधिक गंभीर झाले.

घटनेची माहिती गावात पसरताच संतप्त पालक आणि ग्रामस्थांनी शाळेत धाव घेतली. आरोपी शिक्षकाला जाब विचारण्यात आला. या वेळी काहींनी संतापाच्या भरात त्याला मारहाण केल्याची माहिती आहे. गावात काही काळ तणावाचे वातावरण निर्माण झाले होते.

दरम्यान, घटनेची माहिती मिळताच पोलिसांनी घटनास्थळी पोहोचून परिस्थिती नियंत्रणात आणली आणि संबंधित शिक्षकाला ताब्यात घेतले. पीडित विद्यार्थिनींच्या जबाबांच्या आधारे आरोपीविरोधात गुन्हा दाखल करण्यात आला असून पुढील तपास सुरू आहे.

या घटनेनंतर शिक्षण विभागाने संबंधित शिक्षकाला तातडीने निलंबित केले आहे. या प्रकारामुळे विद्यार्थ्यांच्या सुरक्षिततेबाबत पालकांमध्ये चिंता व्यक्त होत आहे.

या प्रकरणामुळे शाळांमधील विद्यार्थ्यांच्या सुरक्षेचा प्रश्न पुन्हा ऐरणीवर आला आहे.