📰 आ. संजय गायकवाडांवर गुन्हा दाखल करा : भाजपाची मागणी निषेध व्यक्त करत आंदोलनाचा इशारा

📍 देऊळगाव राजा 

जिल्ह्यातील राजकीय वातावरण पुन्हा एकदा तापले असून, आमदार संजय गायकवाड यांच्या कथित वादग्रस्त वक्तव्यावरून भारतीय जनता पार्टीकडून तीव्र निषेध व्यक्त करण्यात आला आहे. देऊळगाव राजा तालुका भाजपाच्या पदाधिकाऱ्यांनी गायकवाड यांच्यावर अॅट्रॉसिटी अॅक्टसह विविध कलमान्वये तात्काळ गुन्हा दाखल करून अटक करण्याची मागणी निवेदनाद्वारे केली आहे.

भाजपाच्या पदाधिकाऱ्यांच्या म्हणण्यानुसार, आ. गायकवाड यांनी ६ एप्रिल रोजी घेतलेल्या पत्रकार परिषदेत भाजपा जिल्हाध्यक्ष तथा माजी आमदार विजयराज शिंदे यांच्यावर गंभीर आणि बेताल आरोप केले. या वक्तव्यामुळे केवळ शिंदे यांचीच नव्हे, तर संपूर्ण भाजपाची बदनामी झाल्याचा आरोप करण्यात आला आहे.

निवेदनात पुढे नमूद करण्यात आले आहे की, कोणताही ठोस पुरावा किंवा तक्रार नसताना आदिवासी आश्रम शाळेतील मुलींविषयी आक्षेपार्ह आणि बदनामीकारक विधान करण्यात आले. यामुळे संबंधित मुलींच्या सन्मानाला धक्का पोहोचू शकतो तसेच त्यांच्या सामाजिक आणि वैयक्तिक आयुष्यावर परिणाम होण्याची भीती व्यक्त करण्यात आली आहे.

तसेच, अशा प्रकारच्या वक्तव्यामुळे आदिवासी समाजात गैरसमज निर्माण होऊन शासनाच्या आश्रमशाळा शिक्षण योजनेवरही परिणाम होऊ शकतो, असेही भाजपाकडून सांगण्यात आले आहे.

या पार्श्वभूमीवर आ. गायकवाड यांच्या विरोधात कठोर कायदेशीर कारवाई करण्यात यावी, अन्यथा भाजपाच्या वतीने रस्त्यावर उतरून तीव्र आंदोलन छेडण्यात येईल, असा इशारा देण्यात आला आहे.

यावेळी ओबीसी प्रदेश उपाध्यक्ष डॉ. सुनील कायदे, शहराध्यक्ष निशिकांत भावसार, तालुकाध्यक्ष प्रभाकर नागरे, उपाध्यक्ष वनिता भूतडा, युवा नेते गणेश नागरे, सूरज हनुमते, सविता पाटील, लोकेश डोणगावकर, डॉ. शंकर तलबे, गणेश ताठे यांच्यासह अनेक पदाधिकारी उपस्थित होते.