जामगाव शिवारात ‘दृश्यम’ स्टाईल हत्याकांड उघड; चार वर्षांनंतर मानवी सांगाडा सापडला

Mehkar

तालुक्यातील जामगाव शिवारात चार वर्षांपूर्वी घडलेल्या खून प्रकरणाचा थरारक उलगडा झाला आहे. बेपत्ता झालेल्या व्यक्तीची हत्या करून मृतदेह हॉटेलच्या मागे जमिनीत सिमेंट काँक्रिटखाली गाडण्यात आल्याचे समोर आले आहे. विशेष म्हणजे आरोपीच्या पत्नीने दिलेल्या माहितीमुळेच या ‘दृश्यम’ स्टाईल हत्याकांडाचा पर्दाफाश झाला. या प्रकरणी मेहकर पोलिसांनी मुख्य आरोपीसह दोघांना अटक केली आहे.

मृत व्यक्तीचे नाव विनोद आश्रुबा नवले (रा. सुकळी, ता. मेहकर) असे आहे. या हत्याकांडातील मुख्य आरोपी सचिन ज्ञानेश्वर उगले असून त्याने सुनील बाजीराव जाधव (रा. सुकळी) याच्या मदतीने हा खून केल्याची कबुली पोलिसांना दिली आहे.

मिळालेल्या माहितीनुसार, २ मे २०२२ रोजी मेहकर ते मोळा मार्गावरील जामगाव शिवारातील रहेमान उर्फ बाबा भिकू कुरेशी यांच्या शेतातील ‘हॉटेल पैलवान’ येथे आरोपींनी विनोद नवले याला दारू पाजली. त्यानंतर कैची व चाकूने गळ्यावर व छातीवर वार करून त्याची हत्या करण्यात आली. खून केल्यानंतर मृतदेह हॉटेलच्या मागे खड्डा खोदून पुरण्यात आला आणि त्यावर सिमेंटचा कोबा करण्यात आला.

दरम्यान, १७ एप्रिल २०२६ रोजी आरोपी सचिन उगलेची पत्नी पतीविरुद्ध तक्रार देण्यासाठी Mehkar Police Station येथे आली होती. पती त्रास देत असल्याची तक्रार करताना तिने चार वर्षांपूर्वी सुकळी गावातील एका व्यक्तीचा घातपात केल्याचा संशयही व्यक्त केला. या माहितीच्या आधारे पोलिसांनी तपास सुरू करून आरोपींवर पाळत ठेवली आणि अखेर प्रकरणाचा उलगडा झाला.

२१ एप्रिलच्या पहाटे पोलिसांनी आरोपींना घटनास्थळी नेऊन खड्डा उकरला असता त्यामध्ये मानवी सांगाडा आढळून आला. सांगाड्यासोबत सापडलेल्या कपड्यांवरून व वस्तूंवरून मृत व्यक्तीची ओळख विनोद नवले अशी पटली.

घटनास्थळी विशेष कार्यकारी दंडाधिकारी, नायब तहसीलदार, फॉरेन्सिक टीम, नगरपालिका कर्मचारी तसेच Dr. Amit Dhode (मेहकर ग्रामीण रुग्णालय) उपस्थित होते. संपूर्ण कारवाईचे व्हिडिओ चित्रीकरणही करण्यात आले.

दरम्यान, पोलीस तपास सुरू असल्याची माहिती Venkatesh Alewar (पोलीस निरीक्षक) यांनी दिली. मृताचा भाऊ मनोज नवले यांच्या तक्रारीवरून आरोपींविरुद्ध भादंवि कलम ३०२, २०१ आणि १२० (ब) अंतर्गत गुन्हा दाखल करण्यात आला आहे.

या गुन्ह्याचा तपास Nilesh Tambe (जिल्हा पोलीस अधीक्षक), Amol Gaikwad (अप्पर पोलीस अधीक्षक) आणि Santosh Khade (उपविभागीय पोलीस अधिकारी) यांच्या मार्गदर्शनाखाली करण्यात आला