छत्रपती संभाजीनगर : राज्य मंत्रिमंडळ बैठकीवेळी घाटी प्रशासनाकडून वेगवेगळ्या नवीन इमारतींच्या बांधकामासाठी ७०० कोटींपेक्षा जास्त रकमेचा प्रस्ताव सादर करण्यात आला होता. मात्र केवळ अतिमहत्वाच्या बांधकामांनाच प्राधान्य देत शंभर कोटी रुपयांपर्यंतचे प्रस्ताव सादर करण्याची सूचना वैद्यकीय शिक्षण मंत्र्यांनी दिल्याने या अनुषंगाने लवकरच प्रस्ताव सादर केले जाणार असल्याचे प्रशासनाने स्पष्ट केले आहे.
तब्बल ६० ते ६५ वर्षांपेक्षा जास्त जुन्या व अपुऱ्या ठरलेल्या विविध विभाग व इमारतींचा विचार करुन मागच्या महिन्यात झालेल्या राज्य मंत्रिमंडळाच्या बैठकीसाठी ७१८ कोटींचा प्रस्ताव सादर करण्यात आला होता. मात्र वैद्यकीय शिक्षण मंत्री हसन मुश्रीफ यांनी बैठकीदरम्यान घाटीला दिलेल्या भेटीवेळी केवळ शंभर कोटींपर्यंतचेच प्रस्ताव सादर करण्याच्या सूचना दिल्या होत्या. तसेच सर्वोच्च प्राधान्यक्रम ठरवून केवळ अतिमहत्वाच्या बांधकामांचा या प्रस्तावामध्ये समावेश करावा, असेही स्पष्ट केले होते. त्यानुसार आता शंभर कोटींचा प्रस्ताव तयार केला जात आहे. या प्रस्तावांमध्ये ट्रॉमा केअर सेंटर, इमर्जन्सी मेडिसिन बिल्डिंग, गायनॅकॉलॉजी अँड न्युबॉर्न बेबी केअर विंग तसेच वसतिगृहांचा समावेश करण्यात येणार असल्याचे प्रशासनाने स्पष्ट केले आहे. या संदर्भात सार्वजनिक बांधकाम विभागाकडून नव्याने हे प्रस्ताव तयार केले जातील आणि त्यानंतर वैद्यकीय शिक्षण विभागाला सादर केले जातील, असेही घाटीचे अधिष्ठाता डॉ़. संजय राठोड यांनी ‘मटा’शी बोलताना सांगितले.
Users Today : 54