छत्रपती संभाजीनगर : माहेरी मुलासह राहायला गेलेल्या पत्नीवर पतीने हल्ला केल्याची घटना घडली आहे. त्याआधी मुलाचे त्याने मुलाचे अपहरण केले होते. काय घडलं नेमकं?
घरगुती वादातून पत्नी ही पतीला सोडून, माहेरात मुलासोबत राहत आहे. या वादातून पतीने आधी मुलाचे अपहरण केले. मुलाचे अपहरण केल्यानंतर, प्लास्टिकची पिशवीत मिरची पुड आणि हातात कोयता घेऊन पत्नीच्या घरात प्रवेश केला. यानंतर पत्नीवर कोयत्याचे वार करून जखमी केले. यानंतर मध्यस्थीला आलेल्या सासरे आणि साल्यावरही वार करून जखमी केले. यानंतर स्वत:च्या हातावर ब्लेडने वार करून आत्महत्या करण्याचा प्रयत्न केला. हा पूर्ण प्रकार १६ ऑक्टोबर रोजी देवळाई परिसरात घडला. या प्रकरणात हल्लेखोर पती मनोज माणिकलाल जैस्वाल (रा. बालाजीनगर, लातुर) याच्याविरोधात चिकलठाणा पोलिस ठाण्यात गुन्हा दाखल केला आहे.
या प्रकरणात चिकलठाणा पोलिस ठाण्यात गणेश राजेंद्र जैस्वाल (वय २६, रा. विजयंतनगर, देवळाई परिसर) यांनी दिलेल्या तक्रारीनुसार, गणेश जैस्वाल यांची बहिणी निशा हिचे लग्न मनोज यांच्याशी झाले. तीन ऑगस्ट रोजी दोघांमध्ये भांडण झाल्यानंतर गणेश यांची बहिणी ही माहेरी आपल्या लहान मुलाला घेऊन राहत आहे. १६ ऑक्टोबर रोजी दुपारी १२ वाजण्याच्या दरम्यान पहिली वर्गात शिकणाऱ्या मुलाची गाडी अडवून मनोज जैस्वाल याने त्याच्या मुलाला ताब्यात घेतले. या घटनेची माहिती मिळताच गणेश यांची बहीण ही पोहोचली. या ठिकाणी मनोज जैस्वाल आणि अभिजीत जैस्वाल यांच्यासोबत एक जणाने निशा जैस्वाल हिला शिवीगाळ करून जिवे मारण्याची धमकी दिली. या प्रकरणात सातारा पोलिस ठाण्यात तक्रार देण्यात आली. यानंतर निशा व गणेश हे घरी आले.गणेश जैस्वाल हा घरी असताना, दुपारी मनोज जैस्वाल हा देवळाई परिसरातील घरात आला. त्याने निशावर कोयत्याने हल्ला केला. तिच्या वाचवण्यासाठी आलेल्या सासरे आणि साल्यावरही हल्ला करून जखमी केले. या हल्ल्यात निशा यांच्या चेहऱ्यावर, हाता-पायावर जखमा झाल्या असून, हाताची बोट कापलेली होती. यानंतर स्थानिक नागरिक आणि पोलिसांच्या मदतीने राजेंद्र जैस्वाल व निशा जैस्वाल या दोघांना घाटी रूग्णालयात उपचारासाठी दाखल केले. दरम्यान, हल्ला करणारा गणेश जैस्वाल याचा दाजी मनोज जैस्वाल यानेही स्वत:च्या शरीरावर ब्लेडने वार करून आत्महत्या करण्याचा प्रयत्न केला. त्यालाही घाटी रूग्णालयात दाखल केले आहे.
Users Today : 47