पुणे : एकात्मिक वाहतूक सुविधेच्या उद्देशाने पुणे रेल्वे स्थानकालगत मेट्रोचे स्थानक उभारले असले, तरीही अद्याप मेट्रो आणि रेल्वेच्या सुविधांबाबत दोन्ही प्रशासनाचा ताळमेळ बसत नसल्याचे दिसून येते. मेट्रो स्थानकातून रेल्वे स्थानकात थेट प्रवेश आहे, मेट्रो प्रवाशांसाठी रेल्वेचा पादचारी पूल खुला आहे. मात्र, रेल्वेच्या हद्दीत मेट्रोचे ‘तिकीट व्हेंडिंग मशीन’ बसविणे किंवा मेट्रोच्या तिकीट मशीनजवळ रेल्वेचे तिकीट ‘एटीव्हीएम’ बसविणे, या गोष्टींची दोन महिन्यांपासून केवळ चर्चाच सुरू आहे. या सुविधांअभावी मेट्रो स्टेशनवरून पुणे रेल्वे स्टेशनकडे जाताना प्रवाशांना अडचणींबरोबरच भुर्दंडही सहन करावा लागत आहे.
गरवारे कॉलेज ते रुबी हॉल क्लिनिक या दरम्यान मेट्रो सेवेचा विस्तार झाल्यानंतर या मार्गावरील प्रवासी सेवा वाढली आहे. या मार्गावरील पुणे रेल्वे मेट्रो स्टेशन एक महत्वाचे आहे. या ठिकाणाहून मेट्रोमधून प्रवास करणाऱ्यांची संख्या मोठी आहे. मेट्रो स्टेशन येथून प्रवाशांना थेट रेल्वे स्टेशनमध्ये प्रवेश दिला आहे. त्यामुळे प्रवाशांची सोय झाली आहे. अनेक प्रवासी आता मेट्रो स्टेशनमधून थेट रेल्वे स्टेशनमध्ये जातात. तसेच, काही प्रवासी रेल्वे स्टेशनच्या पादचारी पुलाचा वापर करून दुसऱ्या बाजूला जातात. फक्त मेट्रोने प्रवास करणाऱ्यांना या पुलाचा वापर करण्यास मनाई असल्याचे अनेकांना माहिती नाही. त्यापैकी काही प्रवाशांना तिकीट तपासणीस पकडत असून, त्यांना आर्थिक फटका बसत आहे.
रेल्वे स्टेशनमधील प्रवाशांना मेट्रोचे तिकीट रेल्वेच्या हद्दीतच मिळावे, पादचारी पुलाचा वापर करण्यास परवानगी द्यावी, अशी मागणी मेट्रोकडून करण्यात आली आहे. तर, रेल्वेही मेट्रोच्या हद्दीत एक एटीव्हीएम मशीन बसविणार आहे. याबाबत दोघांनी एकमेकांकडे प्रस्ताव दिले आहेत. त्याला आता दीड ते दोन महिने झाले. पण, त्यावर काहीही निर्णय होत नाही. त्यामुळे प्रवाशांना त्याचा त्रास सहन करावा लागत आहे. मेट्रोनेही प्रवाशांच्या सोयीच्या दृष्टिकोनातून सर्व प्रश्न सोडविण्यासाठी पाठपुरावा करणे आवश्यक आहे. पण, त्याकडे त्यांचे दुर्लक्ष होत आहे.
गाडी अडली कोठे?
– मेट्रो प्रवाशांच्या सोयीच्या दृष्टिकोनातून रेल्वे स्टेशनमध्ये तिकीट व्हेडिंग मशिन बसविणे गरजेचे आहे.
– मेट्रोच्या अधिकाऱ्यांच्या म्हणण्यानुसार त्यासाठी रेल्वेकडे परवानगी मागितली असून, त्यांच्याकडून अद्याप काहीही कळविण्यात आलेले नाही.
– मेट्रोने केलेल्या मागण्यांबाबत रेल्वे प्रशासनात वरिष्ठ पातळीवरून निर्णय घेतले जाणार असल्याने विलंब होत असल्याची सूत्रांची माहिती.- या प्रक्रियेला वेळ लागत असल्याने प्रवाशांना त्रास सहन करावा लागत आहे.
Users Today : 14