कोल्हापूर: अवघ्या १७ वर्षाची पोर… उराशी काहीतरी करून दाखवण्याची असलेली जिद्द… या जिद्दीच्या जोरावर सैन्य दलात जाण्यासाठी सुरू असलेला सराव… आणि या भरतीच्या सरावा सोबत बॉक्सिंग क्षेत्रात निर्माण झालेली आवड व घरच्यांची आणि प्रशिक्षकांची मिळालेली साथ या जोरावर कोल्हापुरातील शाहूवाडी तालुक्यातील श्रद्धा कृष्णा पाटील ही बॉक्सिंग खेळात राज्यस्तरीय स्पर्धेसाठी निवड झाली आहे. तिचा हा खडतर प्रवास अनेक जणांना प्रेरणा देणारा ठरला आहे.
कोल्हापूर जिल्ह्यातील शाहूवाडी तालुक्यातील श्रद्धा कृष्णा पाटील या १७ वर्षीय मुलीची अवघ्या दोन महिन्याच्या कठोर परिश्रमानंतर १ ते ३ डिसेंबर रोजी अकोला येथे होणाऱ्या राज्यस्तरीय शालेय शासकीय बॉक्सिंग क्रीडा स्पर्धेसाठी निवड झाली आहे. खरतर श्रध्दा ही कोल्हापुर जिल्ह्यातील दुर्गम भागातील शाहूवाडी तालुक्यातील सावर्डे या गावची मुलगी… घरची परिस्थिती अत्यंत हालाखीची.घरात श्रद्धाला दोन बहिणी आणि एक भाऊ…शेती करून घर भागात नसल्याने वडील कृष्णा पाटील यांनी गाव सोडून कोल्हापूर शहरात आले आणि शिरोली एमआयडीसी येथे एका खाजगी कंपनीत कामगार म्हणून काम करण्यास सुरुवात केली. शेती आणि काम असे दोन्ही मिळून त्यांचं घर चालत. श्रद्धाच्या मोठ्या बहिणीचे लग्न झाले तर लहान बहीण आणि भाऊ हे शिक्षण घेत आहे.
श्रद्धाला पुढे जाऊन सैन्य दलात सहभागी व्हायचं आहे. देशसेवेची स्वप्न उराशी बाळगून श्रद्धा ने सुरु केलेला हा प्रवास आणि या प्रवासादरम्यान बॉक्सिंग मुळे मिळालेली नवीन ओळख ही तिला तिच्या भविष्याला नवीन दिशा देणारी ठरणार आहे. शिवाय या साठी तिला तिचे प्रशिक्षक आणि विशेष म्हणजे तिच्या परिवाराकडून मिळत असलेली साथ ही तिची एक मोठी ताकद असल्याचे श्रद्धा पाटील ने म्हटलं आहे.
Users Today : 18