भाजप महायुतीचे उमेदवार चैनसुख संचेती यांना स्वाभामानी शेतकरी संघटनेचा पाठींबा

मलकापूर  :- आगामी विधानसभा निवडणुकीच्या पार्श्वभूमीवर भाजप महायुतीचे उमेदवार तथा माजी आमदार चैनसुख संचेती यांना
नांदुरा तालुक्यातील स्वाभिमानी शेतकरी संघटनेचे पदाधिकारी व शेतक-यांनी एकत्र येऊन बिनशर्त जाहीर पाठिंबा देण्याचा निर्णय घेतला
आहे. शेतकरी प्रश्नांच्या समाधानासाठी संघर्ष करणाऱ्या स्वाभिमानी शेतकरी संघटनेच्या या पाठिंब्याने स्थानिक राजकीय वर्तुळात चर्चांना
उधाण आले आहे. तर स्वाभीमानी शेतकरी संघटनेने जाहीर केलेल्या निवेदनावर तालुक्यातील शेकडो कार्यकर्त्यांच्या स्वाक्षरी आहेत.
नांदुरा तालुक्यातील शेतकऱ्यांच्या समस्यांना चालना देण्यासाठी हा पाठिंबा दिला गेला आहे. स्वाभिमानी शेतकरी संघटनेने मागील काही
वर्षापासून शेतकऱ्यांच्या मुद्द्यांवर सरकारसमोर ठाम भूमिका घेतली आहे. पिकांना हमीभाव, सिंचनाच्या सुविधांची गरज, कर्जमाफी यांसारख्याप्रश्नांवर संघटनेने आपल्या लढ्याचे लोण राज्यभरात पसरवले आहे. त्यामुळे आता विधानसभा निवडणुकीत, या समस्या सोडविण्याची क्षमता असलेल्यांना पाठिंबा देण्याचा निर्णय स्वाभाविक मानला जात आहे. माजी आमदार चैनसुख संचेती यांनी त्यांच्या राजकीय कारकिर्दीत अनेक वेळा शेतकऱ्यांचे मुद्दे सभागृहात मांडले आहेत. सिंचन, पाणीपुरवठा, ग्रामीण विकास व शेतकऱ्यांचे कर्जमाफी यांसारख्या प्रश्नांवर त्यांनी सरकारवर दबाव टाकला आहे. त्यांच्या नेतृत्वातील विविध विकासकामे व शेतकऱ्यांसाठीच्या योजनांमुळे त्यांच्यावर शेतकऱ्यांचा विश्वास आहे. या पाठिंब्यामुळे संचेती यांना निवडणुकीत मजबुती मिळण्याची शक्यता आहे. स्वाभिमानी शेतकरी संघटनेच्या पाठिंब्याने एक मजबूत संदेश दिला आहे की, शेतकऱ्यांची स्थिती सुधारणे व त्यांच्या समस्यांचे निराकरण करणे अत्यावश्यक आहे. संघटनेने स्पष्ट केले आहे की, संचेती यांच्य माध्यमातून शेतकऱ्यांचे प्रश्न गांभीर्याने हाताळले जातील व त्यांना अपेक्षित न्याय मिळेल.
राजकीय समीकरणांमध्ये बदलाची शक्यता स्वाभिमानी शेतकरी संघटनेचा हा पाठिंबा नांदुरा तालुक्यातील राजकीय समीकरणांमध्ये महत्वाची भूमिका बजावू शकतो. संचेती यांच्याशी असलेली शेतकऱ्यांची निष्ठा व संघटनेचा पाठिंबा, निवडणुकीतील इतर उमेदवारांसाठी आव्हान निर्माण करू शकतो. एकीकडे, शेतकऱ्यांच्या समस्यांकडे दुर्लक्ष करणाऱ्या राजकीय पक्षांना या निर्णयामुळे धक्का बसू शकतो, तर दुसरीकडे, शेतकऱ्यांच्या मुद्द्यांवर पुढे येणाऱ्या नेत्यांना प्रोत्साहन मिळू शकते.