वाळूतस्करांना कारवाईपूर्वीच टिप देणारे ते दोन कोतवाल कोण?

जिल्हाधिकारी डॉ. किरण पाटील यांनी वाळूतस्करी मोडित काढण्याचे आदेश दिले असले तरी, सिंदखेडराजा तहसील कार्यालयातच झारीतील शुक्राचार्य असल्याचा संशय निर्माण झाला असून,  असा प्रश्न निर्माण झाला आहे. या दोन संशयास्पद कोतवालांच्या सीडीआरची तपासणी करावी, अशी चर्चाही सुरू असून, यासंदर्भात महारखेड येथील सरपंचपती व शिवसेना तालुका संघटक म्हसाजी वाघ यांनी उपविभागीय अधिकाऱ्यांसह वरिष्ठ अधिकाऱ्यांना निवेदनदेखील दिलेले आहे. सिंदखेडराजा महसूल विभागात बहुतांश अधिकारी चांगले व प्रामाणिक असले तरी काही भ्रष्ट कर्मचाऱ्यांमुळे तहसील कार्यालय बदनाम होत आहे. वाळूतस्करांविरोधात कारवाई करण्यासाठी बैठे पथक जात असताना वाळूतस्करांना टिप दिली जात असून, त्यामुळे सावध झालेले वाळूतस्कर वाहनांसह पळून जातात व लपून बसतात, त्यामुळे या बैठे पथकाला कारवाई करता येत नाही. या टिप प्रकरणी दोन कोतवालांवर संशय निर्माण होत असून, त्यांच्या सीडीआरच्या तपासणीची गरज निर्माण झाली आहे. खडकपूर्णा प्रकल्पासह नदीतून मोठ्या प्रमाणात वाळूतस्करी सुरू असून, सिंदखेडराजा व देऊळगावराजा तहसीलदारांच्या हद्दीत खुलेआम हा प्रकार सुरू आहे. त्यातून कोट्यवधी रूपयांचा शासन महसूल बुडत असून, हे कोट्यवधी रूपये अनैतिक मार्गाने काही अधिकारी व कर्मचारी यांच्या खिशात जात असल्याची चर्चा आहे. उपविभागीय अधिकारी प्रा. संजय खडसे यांनी धडाकेबाज कारवाई करत वाळूतस्करांना दणके दिले आहेत. परंतु, नंतर मात्र बैठे पथकांना कारवाई करून वाळूतस्करी रोखता आली नाही. त्यातच, शेळगाव आटोळ येथे तर राष्ट्रवादी काँग्रेसचे नेते डॉ. विकास मिसाळ यांनाच चिरडण्याचा प्रयत्न झाला होता. त्यामुळे वाळूतस्करांना पाठीशी घालून शासनाचा महसूल बुडविणाऱ्या अधिकारी-कर्मचाऱ्यांवर कारवाई व्हावी, अशी मागणीदेखील महारखेड येथील सरपंचपती व शिवसेना तालुका संघटक म्हसाजी वाघ यांनी एका निवेदनाद्वारे केली आहे. हे निवेदन केंद्रीय मंत्री प्रतापराव जाधव, मेहकरचे आमदार सिद्धार्थ खरात, जिल्हाधिकारी, उपविभागीय अधिकारी यांनादेखील देण्यात आलेले आहे.