शेकडो शेतकऱ्यांचा अंढेरा पोलीस स्टेशनसमोर ठिय्या सरकारविरोधात फसवणुकीचा गुन्हा दाखल करण्याची मागणी

देऊळगाव राजा:-तालुका प्रतिनिधी

महायुती सरकारने २०२४ च्या विधानसभा निवडणुकीपूर्वी शेतकऱ्यांना दिलेल्या सरसकट कर्जमाफीच्या आश्वासनाची पूर्तता न केल्याने शेतकरी वर्गात तीव्र नाराजी आहे. या पार्श्वभूमीवर बुलढाणा जिल्ह्यातील अंढेरा पोलीस ठाण्यावर शेकडो शेतकऱ्यांनी ठिय्या आंदोलन करत सरकारविरोधात फसवणूक (कलम ४२०) आणि आत्महत्येस प्रवृत्त करणे (कलम ३०६ या गुन्ह्यांखाली तक्रार दाखल करण्याची मागणी केली आहे.शेतकरी संघटनेच्या नेतृत्वाखाली भरोसा, देऊळगाव घुबे, रामनगर परिसरातील शेकडो शेतकरी पोलीस स्टेशनवर एकत्र आले. त्यांनी निवडणूकपूर्व आश्वासनाची आठवण करून देत सांगितले की, त्याच विश्वासावर त्यांनी महायुतीला मतदान केले. मात्र, सत्ता स्थापनेनंतर सहा महिने उलटून गेले तरीही सरकारकडून कर्जमाफीचा निर्णय घेण्यात आलेला नाही. दरम्यान, मार्च महिन्यात उपमुख्यमंत्री अजित पवार यांनी शेतकऱ्यांना ३१ मार्च २०२५ पर्यंत कर्ज फेडण्याची तंबी दिली होती. या इशाऱ्यामुळे अनेक शेतकरी मानसिक तणावात आले असून काहींनी आत्महत्येचे टोकाचे पाऊल उचलल्याच्या घटना समोर आल्या आहेत. तक्रार देण्यासाठी गेलेल्या शेतकऱ्यांना उपविभागीय पोलीस अधिकारी मनीषा कदम यांनी आपल्याला ‘सरकारविरोधात गुन्हा दाखल करण्याचा अधिकार नाही’ असे सांगून ही तक्रार एसपी कार्यालयाकडे पाठवून देण्याचे आश्वासन दिले. या अनपेक्षित गर्दीमुळे पोलीस प्रशासनाचीही तारांबळ उडाली होती. अतिरिक्त पोलिस फोर्स आणि व्हॅन अंढेरा पोलीस स्टेशनवर दाखल करण्यात आल्या. या आंदोलनात एकनाथ पाटील, देविदास कंकर, समाधान कनकर, प्रकाश अंभोरे, अच्युतराव पाटील, विलास जमले, प्रकाश घुबे, धोंडू पाटील, तेजराव मुंडे, ज्ञानेश्वर पाटील, गणेश तुपे, विठ्ठल शेटे, नंदकिशोर भगत, आत्माराम गाडी, समाधान घुगे, एकनाथ दगडू पाटील, परमेश्वर गवते, विलास राऊत, विठ्ठल तुपे, सुरेश पवार, शेषराव जाधव, भगतसिंग पवार, जनार्दनातपट, सदाशिव श्रीकृष्ण डोईफोडे, नारायण पैठणी चव्हाण, लिंबाजी पाटील, जगन्नाथ विकास सोळंकी यांसह शेकडो शेतकऱ्यांनी सह्या केल्या आहेत. शेतकऱ्यांची भूमिका ठाम असून त्यांनी स्पष्ट केले आहे की, जोपर्यंत सरकारविरोधात गुन्हा दाखल होत नाही, तोपर्यंत आमचे ठिय्या आंदोलन थांबणार नाही, असे यावेळी शेतकऱ्यांनी सांगितले.