मलकापूर:-तालुका प्रतिनिधी
पदमश्री डॉ.व्ही.बी. कोलते अभियांत्रिकी महाविद्यालयाने राष्ट्रीय बोर्ड ऑफ अॅक्रेडिटेशन (एनबीए) मानांकन मिळविले आहे. या यशस्वी वाटचालीचा गौरव म्हणून संत गाडगेबाबा अमरावती विद्यापीठाचे प्र-कुलगुरु डॉ. महेंद्र धोरे यांनी प्राचार्य डॉ. अनिल खर्चे यांचा सत्कार केला. या सोहळ्यात सचिव डॉ. अरविंद कोलते, सिनेट सदस्य राजेंद्रप्रसाद पांडे आणि डीन डॉ. युगेश खर्चे यांची उपस्थिती होती. एनबीए मानांकन मिळवणे हे सोपे नाही, कारण त्यासाठी शैक्षणिक दर्जा, सुविधा, संशोधन आणि विद्यार्थी विकास या अनेक निकषांचे पालन करावे लागते. या पार्श्वभूमीवर, असोसिएशन ऑफ द मॅनेजमेंट ऑफ नॉन-एडेड प्रोफेशनल कॉलेजेस (महाराष्ट्र) ही संस्था महाविद्यालयांना मार्गदर्शन करत असून, ती सेमिनार, कॉन्फरन्स आणि शैक्षणिक कार्यक्रमांतून गुणवत्ता वाढवण्याचा प्रयत्न करते.अखिल भारतीय तंत्रशिक्षण परिषद, नवी दिल्ली आणि महाराष्ट्र शासन यांच्याशी समन्वय साधत ही संस्था विनाअनुदानित महाविद्यालयांना बळ देते.या मानांकनामुळे महाविद्यालयाला राष्ट्रीय स्तरावर ओळख मिळाली असून, विद्यार्थ्यांसमोर रोजगार, संशोधन आणि उच्च शिक्षणाच्या नव्या संधी उघडल्या आहेत. प्राचार्य डॉ. अनिल खर्चे यांनी सत्कारानंतर बोलताना सांगितले, ‘हे यश संपूर्ण महाविद्यालय कुटुंबाचे आहे. शिक्षक, विद्यार्थी, कर्मचारी आणि प्रशासन यांच्या सहकार्याने हे शक्य झाले. भविष्यात आम्ही नव्या शैक्षणिक उंची गाठण्यासाठी प्रयत्नशील राहू.’ महाविद्यालयाने आता नवोपक्रम, संशोधन प्रकल्प आणि औद्योगिक सहकार्य वाढवण्याचा निर्धार केला आहे. आधुनिक प्रयोगशाळा, तंत्रज्ञान आणि नवीन संधी यामुळे विद्यार्थ्यांचा विकास अधिक गतिमान होईल, असा विश्वास अध्यक्ष नानासाहेब पाटील आणि उपाध्यक्ष प्रदीप कोलते यांनी व्यक्त केला.
Users Today : 218