शेगांवची भक्तीगंगा निर्मल नगरीत अवतरली! मंदिरात भक्तांची अलौकिक गर्दी – महाप्रसादात प्रथमच आंब्याचा रस, सरगुंडे आणि शेवळ्या
नागपूर, २५ मे – प्रतिनिधी देवराव प्रधान
श्री संत गजानन महाराज सेवा ट्रस्टच्या वतीने आयोजित ३० व्या सामूहिक पारायणा निमित्त, निर्मल नगरीच्या मंदिरात भक्तिभावाने भारलेला सोहळा रविवारी पार पडला. सकाळपासून मंदिरात भक्तांची प्रचंड गर्दी उसळली होती, आणि संपूर्ण वातावरण गजानन महाराजांच्या नामस्मरणाने भक्तिमय झाले होते.
सकाळी ६ ते ११ या वेळेत श्री गजानन विजय ग्रंथाचे १ ते २० अध्यायांचे पठण पार पडले. त्यानंतर ११:३० वाजता २१ व्या अध्यायाचे सामूहिक पठण आणि आरती झाली. दुपारी १२ वाजता महाप्रसाद सुरु झाला आणि त्यात जणू काही शेगांवच्या महाप्रसादाचीच अनुभूती लाभली!
महाप्रसादाची खासियत होती:
आंब्याचा रस, सरगुंडे, शेवळ्या, पोळ्या, वांग्याची भाजी, झुणका-भाकरी, आणि मसाला भात यांचा समावेश असलेला साग्रसंगीत प्रसाद! प्रत्येक थाळीतील पदार्थ भक्तांना समाधान देणारे ठरले. मंदिर प्रशासनाने शिस्तबद्ध व्यवस्थापन करत सर्वांना सहजतेने महाप्रसाद दिला.
गजानन महाराजांच्या “गण गण गणात बोते” या मंत्रगजरात आणि भजनांच्या सुरेल लहरींमध्ये साधारण १५०० ते २००० भक्तांनी महाप्रसादाचा आस्वाद घेतला. मंदिर परिसर जणू काही शेगावचे रूप घेऊन आले होते. भक्तांच्या चेहऱ्यावर समाधानाचे हास्य आणि डोळ्यांत भक्तिभाव स्पष्ट दिसत होता.
कार्यक्रमाचे यश:
या यशस्वी आयोजनामागे श्री गजानन सेवा ट्रस्टच्या कार्यकर्त्यांचे अथक परिश्रम आहेत. बाहेरगावाहून आलेले तसेच नागपूरातील भक्तही मोठ्या संख्येने उपस्थित होते.
एकुणात हा सोहळा भक्ती, प्रेम आणि एकात्मतेचा एक अद्वितीय अनुभव ठरला.
Users Today : 44