यवतमाळ प्रतिनिधी
यवतमाळ येथील स्कूल ऑफ स्कॉलर्स विद्यालयात मराठी विभागाच्या वतीने इयत्ता आठवीच्या विद्यार्थ्यांसाठी भाषिक कौशल्यावर आधारित विशेष कार्यशाळेचे आयोजन करण्यात आले. या कार्यशाळेत विद्यार्थ्यांना भाषेचे सौंदर्य, अभिव्यक्तीची ताकद आणि संवादकौशल्याची ओळख करून देण्यात आली.
कार्यक्रमाचे प्रमुख मार्गदर्शन अणे महिला महाविद्यालयाच्या मराठी विभाग प्रमुख डॉ. ममता दयणे महाजन यांनी केले. त्यांच्या प्रभावी व प्रेरणादायी भाषणातून विद्यार्थ्यांना भाषेचे विविध पैलू समजून घेण्याची आणि आत्मविश्वासाने संवाद साधण्याची प्रेरणा मिळाली.
अध्यक्षस्थानी प्राचार्या रीना काळे
या कार्यक्रमाच्या अध्यक्षस्थानी विद्यालयाच्या प्राचार्या रीना काळे होत्या. तर उपप्राचार्या सौ. जागृती गंडेचा यांच्या उपस्थितीने कार्यक्रमास विशेष उर्जा लाभली.
शिक्षकवर्गाचे योगदान
या उपक्रमाच्या यशस्वी आयोजनासाठी मराठी विभाग प्रमुख चैताली सराफ, तसेच मराठी शिक्षिका विजयालक्ष्मी घोडे आणि सुनीता येटरे यांचे विशेष योगदान लाभले. कार्यशाळेचे संचालन धवल कडव याने उत्साहपूर्ण पद्धतीने केले.
विद्यार्थ्यांचा उत्साही सहभाग
विद्यार्थ्यांनी कार्यशाळेत सक्रिय सहभाग नोंदवून प्रश्नोत्तर सत्राद्वारे भाषिक कौशल्य वृद्धीचा प्रत्यक्ष अनुभव घेतला. या उपक्रमामुळे विद्यार्थ्यांमध्ये मराठी भाषेबद्दल आत्मीयता आणि संवादकौशल्य वृद्धीचा उत्साह निर्माण झाला.
कार्यक्रमाचे सर्वत्र कौतुक होत असून, विद्यालयात अशा उपक्रमांमुळे विद्यार्थ्यांच्या सर्वांगीण विकासाला चालना मिळत असल्याचे मत शिक्षक व पालकांनी व्यक्त केले.