स्वस्थ नारी, सशक्त परिवार” अभियानातून भारताची जागतिक स्तरावर ऐतिहासिक कामगिरी — तीन गिनीज वर्ल्ड रेकॉर्ड्सची नोंद!

नवी दिल्ली :- प्रतिनिधी 
महिलांच्या आरोग्य संवर्धन क्षेत्रात भारताने अभूतपूर्व यश मिळवत इतिहास रचला आहे. “स्वस्थ नारी, सशक्त परिवार अभियान” अंतर्गत भारत सरकारच्या आरोग्य व कुटुंब कल्याण मंत्रालयाने तब्बल तीन गिनीज वर्ल्ड रेकॉर्ड्स आपल्या नावे नोंदवले आहेत.

१७ सप्टेंबर ते २ ऑक्टोबर २०२५ या पोषण माह कालावधीत देशभरात १९.७ लाखांहून अधिक आरोग्य शिबिरे आयोजित करण्यात आली. या शिबिरांमध्ये तब्बल ११ कोटींहून अधिक नागरिकांनी उत्साहाने सहभाग नोंदवला.

या मोहिमेअंतर्गत भारताने खालील तीन विक्रम प्रस्थापित केले —
1️⃣ एका महिन्यात आरोग्य सेवा प्लॅटफॉर्मवर सर्वाधिक लोकांची नोंदणी — ३,२१,४९,७११
2️⃣ एका आठवड्यात स्तन कर्करोग तपासणीसाठी सर्वाधिक ऑनलाइन नोंदणी — ९,९४,३४९
3️⃣ एका आठवड्यात वाइटल साईन्ससाठी सर्वाधिक ऑनलाइन नोंदणी — १,२५,४०६

ही तिन्ही कामगिरी ३१ ऑक्टोबर २०२५ रोजी नवी दिल्ली येथे अधिकृतरीत्या नोंदवण्यात आली, ज्यामुळे भारताच्या आरोग्य क्षेत्राने जागतिक पातळीवर नवा आदर्श निर्माण केला आहे.

या उपक्रमाचे श्रेय पंतप्रधान नरेंद्र मोदी आणि केंद्रीय आरोग्यमंत्री जे. पी. नड्डा यांच्या निश्चयपूर्ण व दूरदर्शी नेतृत्वाला दिले जात आहे. महिलांच्या आरोग्य सुरक्षेला प्राधान्य देणाऱ्या या अभियानामुळे समाजात व्यापक जनजागृती निर्माण झाली आहे.

या ऐतिहासिक यशात योगदान देणाऱ्या सर्व आरोग्यसेवक, स्वयंसेवक, कार्यकर्ते आणि नागरिकांचे मनःपूर्वक अभिनंदन करण्यात येत आहे.