धर्म, शेतकरी, जमीन आणि इथला मराठी माणूस… ‘पुन्हा शिवाजीराजे भोसले’ पाहिल्यानंतर राज ठाकरेंची पहिली पोस्ट “शेतकरी हतबल, विकास फक्त सत्ताधाऱ्यांचा” — राज ठाकरे

मुंबई :
महेश मांजरेकर दिग्दर्शित आणि अभिनेता सिद्धार्थ बोडके अभिनीत ‘पुन्हा शिवाजीराजे भोसले’ हा चित्रपट सध्या राज्यभरात चर्चेचा विषय ठरत आहे. महाराष्ट्राच्या सामाजिक आणि राजकीय वास्तवावर भाष्य करणारा हा चित्रपट पाहिल्यानंतर मनसे अध्यक्ष राज ठाकरे यांनी सोशल मीडियावर खास प्रतिक्रिया व्यक्त केली असून, “हा चित्रपट जरूर पाहा” असं आवाहन त्यांनी नागरिकांना केलं आहे.

राज ठाकरेंची मनोगतपूर्ण पोस्ट

राज ठाकरे यांनी त्यांच्या पोस्टमध्ये लिहिलं आहे —

“आज फक्त मोठे मोठे महामार्ग, पूल (ज्यावर काही महिन्यांत खड्डे पडतात) आणि चमकदार घोषणा म्हणजे ‘विकास’ अशी कल्पना सत्ताधाऱ्यांनी रुजवली आहे. यात बाकी कोणाचा विकास होतो की नाही माहीत नाही, पण सत्ताधाऱ्यांचा विकास नक्की होतो. धर्माच्या नावावर लोकांना आंधळं केलं की मग शेतकरी असो किंवा इथला मराठी माणूस — सगळ्यांना वापरून फेकून द्यायला हे मोकळे आहेत.”

“शेतकरी हतबल, जमीन विकावी लागते”

राज ठाकरे पुढे म्हणाले —

“या राज्यातील शेतकरी पार हतबल आहे. एका बाजूला पाऊस झोडपतो आणि दुसऱ्या बाजूला सरकारी यंत्रणा अनास्थेने झोडपते. ज्यांच्या पाठीवर छत्रपती शिवाजी महाराजांनी हिंदवी स्वराज्य उभं केलं, त्या महाराष्ट्रातील शेतकरी आत्महत्या करतो, हे या राज्याचं भीषण दुर्दैव आहे.”

“एका बाजूला ग्रामीण भागात शेतकऱ्याला इतकं जेरीस आणायचं की त्याला जमीन विकावीच लागेल आणि दुसऱ्या बाजूला शहरात मराठी माणसांनाच घरं नाकारायची. त्यांच्या भाषेचा अपमान करणाऱ्यांना अभय द्यायचं, त्यांच्या खाण्या-पिण्यावर बंधन आणणाऱ्यांचे लाड करायचे — हेच सुरु आहे.”

‘पुन्हा शिवाजीराजे भोसले’चा आशय

‘पुन्हा शिवाजीराजे भोसले’ या चित्रपटात छत्रपती शिवाजी महाराज आजच्या काळात अवतरतात आणि शेतकऱ्यांच्या प्रश्नांसाठी लढा देतात अशी कथा मांडण्यात आली आहे.
महेश मांजरेकर दिग्दर्शित या चित्रपटात सिद्धार्थ बोडके यांनी शिवाजी महाराजांची भूमिका साकारली असून, त्यांच्या अभिनयाचं आणि चित्रपटाच्या संदेशाचं मोठं कौतुक होत आहे.

राज ठाकरेंचा संदेश

राज ठाकरे यांनी पोस्टच्या शेवटी लिहिलं आहे —

“खरा समकालीन आणि आजच्या परिस्थितीवर आधारित चित्रपट पाहायचा असेल, तर ‘पुन्हा शिवाजीराजे भोसले’ला पर्याय नाही. हा चित्रपट महाराष्ट्रातील प्रत्येक मराठी माणसाने पाहावा.”

चित्रपटाला प्रेक्षकांचा उत्स्फूर्त प्रतिसाद

३१ ऑक्टोबरला प्रदर्शित झालेला हा चित्रपट महाराष्ट्रातील अनेक ठिकाणी हाऊसफुल्ल चालत असून, तरुण वर्गात विशेष लोकप्रिय ठरला आहे.
चित्रपटातील संवाद, पार्श्वसंगीत आणि ग्रामीण पार्श्वभूमीवर मांडलेले दृश्य प्रभावी ठरत आहेत.