छत्रपती संभाजीनगर : वक्फ बोर्डाच्या जागेवर कब्जा किंवा अशा जमिनीवर अतिक्रमण होत असल्याच्या तक्रारी प्राप्त होत असतात. अशा तक्रारी आता थेट वक्फ बोर्डाकडून तयार होत असलेल्या लीगल सेल तपासणीला दिली जाणार आहे. लीगल सेलच्या अभिप्रायानंतर वक्फ बोर्डाकडून बोर्डाच्या मालमत्तेवर अतिक्रमण किंवा कब्जा करणाऱ्यांवर कारवाई करण्यात येणार आहे. हा निर्णय वक्फ बोर्डाच्या बैठकीत घेण्यात आला आहे.
गेल्या तीन दिवसांपासून शहरात वक्फ बोर्डाच्या सदस्यांची बैठक सुरू आहे. यात पहिले दोन दिवस हे वक्फ बोर्डाच्या सदस्यांनी विविध प्रकरणांवर सुनावणी घेण्यात आली. शुक्रवारी बोर्डाच्या सदस्यांची नियमित बैठक घेण्यात आली. ही बैठक वक्फ बोर्डाचे अध्यक्ष वजाहत मिर्झा यांच्या उपस्थितीत घेण्यात आली. या बैठकीत राज्यभरातील कोट्यवधींच्या जमिनीवर कब्जा नाकारणाऱ्या भूखंड माफियांच्या विरोधात कठोर कायदेशीर कारवाई करण्याचा निर्णय घेण्यात आला आहे. त्यासाठी वक्फ मंडळाने कायदेशीर बाबींच्या निपटारा करण्यासाठी सेल नेमण्याचा निर्णय घेतला आहे. न्यायलयात सुरू असलेल्या अनेक प्रकरणांमध्ये लीगल सेलद्वारे वकिलांना आवश्यक ती माहिती देण्यात येणार आहे. सोलापूरच्या चिरागली कब्रस्तान व पुण्याच्या आलमगीर मशिदीबाबत अनेक तक्रारी होत्या. त्याबाबत बोर्डाच्या बैठकीत चर्चा करण्यात आली. शहरातील एका मोठ्या व मोक्याच्या जागेविषयी ही सदस्यांनी गंभीरतेने चर्चा करून प्रकरण लवकरात लवकर मार्गी काढण्याचा सर्वानुमते निर्णय घेण्यात आला. आता वक्फ बोर्डाकडे कायदेशीर लढाईसाठी नामांकित व अभ्यासू वकील सेलमार्फत मिळणार असल्याने बोर्डाला भक्कमपणे बाजू मांडता येईल, असा विश्वास ही अध्यक्ष डॉ. मिर्जा यांनी व्यक्त केला. प्रत्येक जिल्ह्यात वक्फ बोर्डाच्या पॅनेलवर वकील नेमण्याचा निर्णय घेण्यात आला. या बैठकीत डॉ. वजाहत मिर्जा यांच्यासह सदस्य व खासदार फौजियाखान, खासदार इम्तियाज जलील, आमदार फारूक शहा, मौलाना अथर अली, हसनैन शाकिर, मुदसीर लांबे, समीर काजी, उपमुख्यकार्यकरी अधिकारी जुनेद सय्यद व इतर अधिकारी व कर्मचाऱ्यांची उपस्थिती होती. मुख्यकार्यकारी अधिकारी मोईन ताशीलदार यांनी व्हिडियो कॉन्फरन्सच्या माध्यमातून बैठकीत सहभाग घेतला.
१३८ प्रकरणांचा निपटारा
पहिल्या दिवशी ४२ व दुसऱ्या दिवशी ९६ असे १३८ प्रकरण बाबत सुनावणी घेण्यात आली. यापैकी ७० प्रकरणांचा क्लोज फॉर ऑर्डर करण्यात आली. यात नोंदणी, योजना, फेरफार, अतियात आणि इतर प्रकरणांचा समावेश आहे.
महसूल वाढविण्यासाठी प्रयत्न
महसूल वाढीसाठी वक्फ बोर्डाकडून प्रयत्न सुरू आहेत. त्यासाठी राज्यातील वक्फ जामिनींना भाडेतत्त्वावर देण्याचा निर्णय घेण्यात आला होता. या प्रयोगास प्रतिसाद मिळत असून, त्यामुळे महसुलात वाढ होण्याची अपेक्षा आहे. ही प्रक्रिया सर्व कायदेशीर बाजू तपासूनच अंमलात आणण्याचा बोर्डाचा मानस आहे.
कर्मचाऱ्यांना सातवा वेतन आयोग
वक्फ बोर्डाच्या कर्मचाऱ्यांना सातवा वेतन आयोग लागू करण्याचा निर्णय घेण्यात आला आहे. यामुळे आगामी काही महिनयात वक्फ बोर्डाच्या कर्मचारी आणि अधिकारी यांचे वेतन सातवे वेतन आयोगानुसार करण्यातबाबतही या बैठकीत चर्चा करण्यात आले.
Users Today : 9