म. टा. प्रतिनिधी, धाराशीव : महाराष्ट्राची कुलस्वामिनी श्री तुळजाभवानी देवीच्या तिजोरीत नवरात्र महोत्सवाच्या कालावधीत पावणेचार कोटी रुपयांची देणगी जमा झाली आहे. देणगी दर्शन, दानपेटीत अर्पण केलेली रोख रक्कम आणि इतर धार्मिक विधींच्या माध्यमातून ही रक्कम तुळजाभवानी मंदिर संस्थानला प्राप्त झाली आहे. याच कालावधीत भाविकांनी सोने आणि चांदी मोठ्या प्रमाणात देवीचरणी अर्पण केली आहे.श्री क्षेत्र तुळजापूर (जि. धाराशीव) येथे नवरात्र काळात म्हणजे १५ ऑक्टोबर ते २४ ऑक्टोबर दरम्यान तीन लाख ७३ हजार २४७ भाविकांनी तुळजाभवानी मंदिर समितीकडे अधिकृतपणे पैसे जमा करून देणगी दर्शन घेतले. त्यातून तुळजाभवानी मंदिर संस्थानला एक कोटी ९३ लाख ६६ हजार ४६२ रुपये प्राप्त झाले. तुळजाभवानी देवीच्या दर्शनासाठी आलेल्या भाविकांनी दानपेटीमध्ये दीड कोटींहून अधिक रुपयांची रोकड अर्पण केली. मागील नऊ दिवसांच्या कालावधीत तुळजाभवानी मंदिरातील दानपेटीमध्ये एक कोटी ५७ लाख ४२ हजार ७३० रुपये जमा झाले असल्याची अधिकृत नोंद आहे.
विविध धार्मिक विधीपोटी मंदिर प्रशासन कार्यालयात पावती फाडून रोख रक्कम जमा करणार्या भाविकांची संख्याही मोठी आहे. नऊ दिवसांत २२ लाख ३९ हजार ५७७ रुपये इतका महसूल तुळजाभवानी मंदिर समितीला प्राप्त झाला. देणगी दर्शन, दानपेटी आणि इतर माध्यमातून मिळालेली ही सर्व रक्कम तीन कोटी ७३ लाख ४८ हजार ७६९ रुपये एवढी आहे.भाविकांनी देवीचरणी वेगवेगळ्या मौल्यवान दागदागिने नवरात्रोत्सवात अर्पण केले. तुळजाभवानी मातेच्या चरणी ७३६ ग्रॅम सोने आणि ११ किलो ९५४ ग्रॅम चांदी अर्पण करण्यात आली असल्याची माहिती तुळजाभवानी मंदिर समितीचे प्रशासकीय अधिकारी सिद्धेश्वर शिंदे यांनी दिली.
Users Today : 9