गरीबांची दिवाळी गोड! नागपूरच्या ३२ लाख लाभार्थ्यांना १ नोव्हेंबरपासून ‘आनंदाचा शिधा’, काय मिळणार?

म.टा. प्रतिनिधी, नागपूर : गौरी गणपती उत्सवानिमित्त जिल्ह्यातील अंत्योदय आणि प्राधान्य कुटुंबातील लाभार्थ्यांना आनंदाचा शिधा वितरित करण्यात आला. त्यानंतर आता दिवाळीची तयारी सुरू झाली आहे. येत्या एक नोव्हेंबरपासून आनंदाचा शिधा वितरित करायला सुरुवात होणार असल्याचे जिल्हा पुरवठा विभागाकडून सांगण्यात आले. जिल्ह्यातील ३२ लाख लाभार्थ्यांसाठी हा शिधा प्राप्त होणार आहे.राज्यातील सार्वजनिक वितरण व्यवस्थेअंतर्गत अंत्योदय अन्न योजना व प्राधान्य कुटुंब शिधापत्रिकाधारक यांना आनंदाचा शिधा वितरित करण्याचा निर्णय २२ ऑगस्ट २०२३ रोजी अन्न, नागरी पुरवठा व ग्राहक संरक्षण विभागाच्यावतीने घेण्यात आला. यापूर्वीही गेल्यावर्षी २०२२च्या दिवाळी सणानिमित्त तसेच २०२३ मध्ये गुढीपाडवा, डॉ. बाबासाहेब आंबेडकर जयंतीनिमित्त हा शिधा वितरित करण्यात आला होता. गौरी गणपतीसाठी शहरातील ३ लाख ८३ हजार ३४७ आणि ग्रामीण भागातील ४ लाख १६ हजार ९९७ लाभार्थ्यांना आनंदाचा शिधा वितरित करण्यात आला आहे. दिवाळीतील शिधा शहरातील ३ लाख ८७ हजार आणि ग्रामीणमधील ४ लाख १८ हजार ७४५ लाभार्थ्यांना अवघ्या १०० रुपयांत वितरित करण्यात येईल, असे जिल्हा पुरवठा अधिकारी रमेश बेंडे यांनी सांगितले.काय मिळणार ?
पामतेल : १ लिटर
साखर : १ किलो
चनाडाळ : अर्धा किलो
रवा : अर्धा किलो
पोहा : अर्धा किलो
मैदा : अर्धा किलोमोफत धान्य डिसेंबरपर्यंत

आनंदाचा शिधा वितरित करण्याची तयारी झाली आहे. यासाठीचे साहित्य पुरवठा विभागाला प्राप्त झाले आहे. शिधासाठी साहित्य उपलब्ध करून देण्याची जबाबदारी जस्ट किचनच्या पगारिया यांच्याकडे सोपविण्यात आली आहे, असे रमेश बेंडे यांनी सांगितले. यासोबतच शासनाकडून डिसेंबर २०२३ पर्यंत नियमित मोफत धान्याचे वितरण केले जाणार आहे. यात प्राधान्य गटातील लाभार्थ्यांना प्रती व्यक्ती ५ किलो आणि अंत्योदय गटातील लाभार्थ्यांना प्रती कुटुंब ३५ किलो धान्य वितरित होणार आहे.जिल्ह्यातील लाभार्थी (कार्डधारक)
शहर : ४ लाख ६ हजार २८७
ग्रामीण : ४ लाख ३१ हजार ९१५