त्र्यंबकेश्वर : त्र्यंबकेश्वर मंदिर देवस्थान संस्थान ट्रस्टच्या वतीने शनिवारी कोजागिरी पौर्णिमेच्या निमिताने श्री सप्तशृंगी मातेला भरजरी पैठणीची साडी-चोळी तसेच शृंगार साहित्य अर्पण करण्यात आले. विश्वस्त मंडळाने या वर्षीच्या कोजागरीपासून ही प्रथा नव्याने सुरू केली आहे.त्र्यंबकेश्वर ट्रस्टच्या वतीने ही साडी-चोळी आणि शृंगार साहित्य ढोलताशे-वाद्यांच्या गजरात, शंखाच्या निनादात, भालदार-चोपदारांच्या संस्थानी इतमामात सप्तशृंग गडावर जाऊन भगवतीचरणी अर्पण करण्यात आले. यापुढे दरवर्षी त्र्यंबकराजाला स्पर्श करून भगवतीला मानाची साडी-चोळी अर्पण केली जाणार आहे.
त्र्यंबक-सप्तशृंग गडाचे पौराणिक नाते
यामागे त्र्यंबकेश्वर आणि सप्तश्रृंग गड यांचे पौराणिक, ऐतिहासिक नाते आहे. निवृत्तिनाथांच्या ग्रंथात मच्छिंद्रनाथ अंजनेरी पर्वतावर गेल्याचे आणि तेथून संजीवनी सिद्ध करून सप्तश्रृंग गड येथे जल घेऊन गेल्याचा उल्लेख आहे. संत निवृत्तिनाथ यांनी संजीवन समाधी घेण्यापूर्वी सप्तश्रृंग गड येथे जाऊन आल्याचेही संत नामदेव महाराजांनी लिहिलेल्या समाधी प्रकरणात वर्णन आले आहे.
त्र्यंबकेश्वर येथून दरवर्षी हजारो कावडधारक पायी चालत गोदावरीचे तीर्थ कुशावर्तातून घेऊन कोजागरी पौर्णिमेच्या दिवशी गडावर अर्पण करतात. त्र्यंबकेश्वरच्या कावड धारकांनी नेलेल्या तीर्थाने सर्वप्रथम देवीला स्नान घातले जाते.
Users Today : 15