बॅंकेच्या बहाण्याने निर्जनस्थळी नेलं, आधी पत्नीचे केस कापले अन् नंतर…, पतीचं भयंकर कृत्य

म. टा. प्रतिनिधी, छत्रपती संभाजीनगर : चारित्र्यावर शंका घेऊन पत्नीला बँकेत जाण्याच्या बहाण्याने सोबत आणले. तिला गेवराई व नक्षत्रवाडीच्या डोंगराच्या पायथ्याशी आणले. या ठिकाणी पत्नीचे केस कापून, तिच्या अंगावर पेट्रोल टाकून तिला जाळण्याचा प्रयत्न करण्यात आला. सदर महिला २५ टक्के जळाली आहे. या प्रकरणात पती रामकिसन माळी (रा. गेवराई) याच्या विरोधात सातारा पोलिस ठाण्यात गुन्हा नोंदवून, हे प्रकरण चिकलठाणा पोलिस ठाण्याकडे वर्ग करण्यात आला आहे.या प्रकरणात ३५ वर्षीय महिलेने दिलेल्या जबाबानुसार, गेवराई येथील रामकिसन माळी यांच्यासोबत गेल्या काही वर्षांपासून वाद सुरू होते. रामकिसन चारित्र्यावर शंका घेऊन तिला मारहाण करीत होते. वारंवार महिलेने समजूत घालण्याचा प्रयत्न केला असता, त्यांचा राग नेहमीच असायचा. २६ ऑक्टोबर रोजी सदर महिलेला बँकेत जायचे आहे. असे सांगून सोबत घेऊन गावातून शहराकडे निघाले. दुपारी दोनच्या दरम्यान हे दोघे नक्षत्रवाडी व गेवराईच्या डोंगराच्या पायथ्याशी आले. त्यानंतर माळी यांनी पत्नीशी वाद घालून आणि मारहाण केली. तिच्या डोक्यावरचे केस कापले. त्यानंतर तिच्या अंगावर पेट्रोल टाकून तिला जाळले. त्यानंतर रामकिसन पळून गेला. भाजलेल्या अवस्थेत माळी यांच्या पत्नीला घाटीमध्ये दाखल करण्यात आले.