येवला : येथील प्रशासकीय संकुलात सकल मराठा समाजाच्या कार्यकर्त्यांचे गेल्या ४२ दिवसांपासून ठिय्या आंदोलन आणि १४ दिवसांपासून अन्नत्याग आंदोलन सुरू आहे. तीन दिवसांपूर्वी आंदोलनस्थळी स्वतःचे मुंडन करून घेणाऱ्या या आंदोलनकर्त्यांनी आज, सोमवारपासून सरणावर झोपून अन्नत्याग आंदोलन करण्याचा निर्णय घेतला आहे.मराठा समाजाला सरसकट आरक्षण देण्यात यावे या व इतर मागण्यांसाठी येवला प्रशासकीय संकुल आवारात संजय सोमासे, निंबाजी फरताळे, विजय मोरे, गोरख संत व रवींद्र शेळके यांचे गेल्या ४२ दिवसांपासून ठिय्या आंदोलन सुरू आहे. या आंदोलनकर्त्यांनी गेल्या १४ दिवसांपासून अन्नत्याग केला आहे. शुक्रवारी त्यांनी आंदोलनस्थळी स्वतःचे मुंडन करून घेतले होते. आता या आंदोलनकर्त्यांनी आज, सोमवारपासून सरणावर झोपून अन्नत्याग व पाणीत्याग करणार असल्याचे जाहीर केले आहे. तसे पत्र आंदोलनकर्त्यांनी येवला शहर पोलिसांसह प्रशासनाला पाठवले आहे. सरणावर झोपलेल्या आंदोलकांना अग्नीडाग देण्यासाठी राज्याचे मुख्यमंत्री, जिल्हाधिकारी अथवा कोणत्याही प्रशासकीय अधिकाऱ्याने वेळ मिळेल तेव्हा यावे, असे उपरोधिक आवाहनही आंदोलनकर्त्यांच्या वतीने करण्यात आले आहे.पोलिसांनी परवानगी नाकारली
सरणावर झोपून अन्नत्याग व पाणीत्याग आंदोलन करण्यास शहर पोलिसांनी परवानगी नाकारली आहे. अशा स्वरूपाचे आंदोलन करू नये, अशी सूचना पोलिसांनी पत्राद्वारे आंदोलनकर्त्यांना दिली आहे. आंदोलनामुळे येवला शहर पोलिस स्टेशन हद्दीत कायदा व सुव्यवस्थेचा प्रश्न निर्माण झाल्यास त्यास आपण जबाबदार असाल. अशा स्वरूपाचे आंदोलन केल्यास कारवाई करण्यात येईल, असेही पोलिसांनी म्हटले आहे.अधिकाऱ्यांकडून मन वळविण्याचे प्रयत्न
आंदोलनकर्त्यांची तालुका प्रशासनाच्या वरिष्ठ अधिकाऱ्यांनी वारंवार भेट घेऊन त्यांचे मन वळविण्याचे प्रयत्न केले आहेत. शुक्रवारी सायंकाळी येवला प्रांताधिकारी बाबासाहेब गाढवे, तहसीलदार आबा महाजन व पोलिस निरीक्षक नंदकुमार कदम आदींनी त्यांच्याशी संवाद साधला. दीड तास चर्चा करीत अन्नत्याग आंदोलन मागे घेण्याचे आवाहन केले. यावेळी प्रांताधिकारी व तहसीलदार यांनी भ्रमणध्वनीवरून जिल्हाधिकाऱ्यांशी संवाद साधत आंदोलनकर्त्यांशी बोलणे करून दिले. येत्या बुधवारी (दि. १ नोव्हेंबर) जिल्हाधिकारी कार्यालयात बैठक लावण्याचे आश्वासन देण्यात आले होते.
Users Today : 18