मराठा आंदोलनाचे तीव्र पडसाद; छत्रपती संभाजीनगरमध्ये ठिकठिकाणी उपोषण, कॅंडल मार्च सुरु

छत्रपती संभाजीनगर : मराठा आरक्षणासाठी बेमुदत उपोषणास बसलेल्या मनोज जरांगे पाटील यांच्या आंदोलनास पाठिंबा शहर व जिल्ह्यात मोठा पाठिंबा मिळत आहे. ठिकठिकाणी लाक्षणिक उपोषण, ठिय्या आंदोलने सुरू आहेत. सोमवारी शहराच्या विविध भागांतून कँडल मार्च काढण्यात आला. जिल्हा न्यायालयातील वकिलांनी लाक्षणिक उपोषण केले. भिंदोन (ता. छत्रपती संभाजीनगर) येथे माजी पंचायत समिती सदस्य अनुराग शिंदे बेमुदत उपोषणास बसले आहेत. पळशी चौफुलीवर पंचक्रोशीतील उपोषणात मांडकी येथील ग्रामस्थ सहभागी झाले होते.मनोज जरांगे यांच्या उपोषणास पाठिंबा देण्यासाठी क्रांती चौक येथे गेल्या सहा दिवसांपासून ठिय्या आंदोलन सुरू आहे. मुकुंदवाडी भागातही उपोषण सुरू आहे. जयभवानीनगर येथे सोमवारी आंदोलन करण्यात आले. कँडल मार्च काढण्यात आला.

वकिलांचे लाक्षणिक उपोषण

मराठा आरक्षण आंदोलनात आता वकील मंडळीही सहभागी झाले आहेत. ‘मराठा आरक्षण एकच आमचे लक्ष’ असे जाहीर करून जिल्हा न्यायालयातील वकिलांनी सोमवारी जिल्हा न्यायालयाच्या उत्तरेच्या गेटसमोर लाक्षणिक उपोषण केले. आंदोलनात वकील बांधव मोठ्या संख्येने सहभागी झाले होते.उपोषणात सहभागी झालेल्या वकिलांच्या वतीने राज्य सरकारला निवेदन पाठविण्यात आले. या निवेदनात जिल्हा न्यायालयातील वकील मंडळींनी मराठा समाजाला सरसकट कुणबी प्रमाणपत्र देऊन मराठ्यांचा ओबीसीमध्ये समावेश करावा, मराठा आरक्षणासाठी बलिदान दिलेल्या ४५ समाज बांधवांच्या कुटुंबीयांना आर्थिक मदत व त्यांच्या घरातील एकाला सरकारी नोकरी, आरक्षण प्राप्त व्यक्तींचे सर्वेक्षण करून प्रगत जाती आरक्षणामधून बाहेर काढा, मराठा आरक्षण देता येत नसेल तर समान नागरी कायद्याची अंमलबजावणी करावी आदी मागण्या केल्या

ठिकठिकाणी बेमुदत उपोषण

भिंदोन येथे माजी पंचायत समिती सदस्य अनुराग पाटील शिंदे व प्रविण मोरे यांनी बेमुदत उपोषण सुरू केले आहे. गावातील सर्व मराठा बांधव पाठिंबा देण्यासाठी मोठ्या संख्येने सहभागी झाले आहेत. जोपर्यंत मराठा समाजाला सरसकट कुणबी प्रमाणपत्र वाटप व मराठा समाजाला आरक्षण देत नाही तोपर्यंत बेमुदत आमरण उपोषण करणार आहे. उपोषण कर्त्यांना काही झाल्यास सर्वस्वी जबाबदारी सरकारची राहील, असे निवेदन जिल्हाधिकाऱ्यांना देण्यात आले आहे.

झाल्टा फाटा चौफुली येथे शुक्रवारपासून आकाश पाटील चव्हाण या युवकाने बेमुदत उपोषणास सुरूवात केली. याप्रसंगी जगदीश डवले, विलास शेळके, शिव लोखंडे, गणेश दसपुते, श्रीमंत पठाडे, परमेश्वर साळुंके, सुरेश मोकासे, राहुल वाघमोडे यांच्यासह समाज बांधव उपस्थित होते.

ओहर गावात आंदोलन

मराठा आरक्षणाच्या मागणीसाठी ओहर गावात सोमवारपासून साखळी उपोषणास सुरूवात झाली. मागणीकडे लक्ष वेधण्यासाठी व शासनाचा निषेध म्हणून आंदोलनकर्त्यांनी मुंडणही केले. पळशी चौफुली येथे पंचक्रोशीतील गावे दररोज एक दिवय लाक्षणिक उपोषण करत आहेत. सोमवारी मांडकी येथील ग्रामस्थ उपोषणास बसले होते.खासदारकीचा राजीनामा द्या

मराठा आरक्षणासाठी तुम्ही आवाज उठवा. मुख्यमंत्र्यांना फोन लावा, खासदारकीचा राजीनामा द्या अशी मागणी मराठा आंदोलकांनी खासदार इम्तियाज जलील यांनी केली.

सोमवारी दुपारी आंदोलक खासदार जलील यांच्या घरी पोचले आणि घोषणाबाजी केली. जलील घराबाहेर आले आणि त्यांनी कार्यकर्त्यांना घरात येण्याची विनंती केली मात्र आंदोलक दारासमोर बसले. खासदार जलील यांनी त्यांच्यासोबत खाली बसून चर्चा केली. मराठा समाजाला आरक्षण मिळाले पाहिजे, यासाठी अनेकांनी जीव दिला आहे. समाजाला आरक्षण दिले जात नाही. याबाबत तुम्ही मुख्यमंत्र्यांशी बोला अशी मागणी केली. खासदारांनी मुख्यमंत्र्यांशी बोलण्याचा प्रयत्न केला. त्यांचा मोबाईल लागला नाही. त्यांच्या अधिकाऱ्यांशी चर्चा करण्यासाठी फोन केला तो ही लागला नाही. मराठा आरक्षणासाठी मी तुमच्यासोबत आहे. मराठा समाजाच्या युवकांनी आत्महत्या करु नये, असे आवाहन खासदार जलील यांनी केले.आज कँडल मार्च

मराठा समाजाच्या आरक्षणासाठी डॉ. बाबासाहेब आंबेडकर मराठवाडा विद्यापीठातील विद्यार्थी, संशोधक यांच्या वतीने मंगळवारी ३१ ऑक्टोबर रोजी सायंकाळी कँडल मार्च काढण्यात येणार आहे.

विद्यापीठातील छत्रपती शिवाजी महाराजांच्या पूर्णाकृती पुतळ्यापासून मंगळवारी सायंकाळी पाच वाजता हा मार्च काढण्यात येईल. भारतरत्न डॉ. बाबासाहेब आंबेडकर यांच्या पुर्णाकृती पुतळ्याजवळ कँडल मार्चचा समारोप करण्यात येईल. या मार्चमध्ये विद्यार्थी, संशोधक, कर्मचारी प्राध्यापक मोठ्या संख्येने सहभागी होणार आहेत. कँडल मार्चमध्ये सहभागी होण्याचे आवाहन मराठा आरक्षण विद्यार्थी जन आंदोलन समिती, सारथी विद्यार्थी संशोधक कृती समिती, शिक्षकेत्तर कर्मचारी संघटना व प्राध्यापक संघटना यांच्या वतीने करण्यात आले आहे.