नागपूर : लोकसभा आणि विधानसभा निवडणुका जवळ आल्या असल्याने निवडणूक विभागाने नियोजित कार्यक्रमानुसार नुकतीच प्रारूप मतदारयादी प्रसिद्ध केली. जिल्ह्यातील १२ विधानसभा मतदारसंघांतील एकूण मतदारांची संख्या ४१ लाख ७३ हजार ८७७ आहे. यात पुरुषांच्या तुलनेत महिला मतदारांची संख्या ६७ हजार ५५१ने कमी असल्याचे दिसून आले. मात्र, दक्षिण-पश्चिम आणि दक्षिण मतदारसंघात महिला मतदार अधिक असल्याचे चित्र आहे.अधिकाधिक मतदार नोंदणी होऊन लोकशाही बळकट व्हावी यासाठी निवडणूक विभागाने मतदार नोंदणीची विशेष मोहीम हाती घेतली. या प्रक्रियेनुसार प्रसिद्ध झालेल्या प्रारूप मतदारयादीत ९२ हजार ६३३ नवमतदारांची भर यात पडली. जिल्ह्यातील १२ विधानसभा मतदारसंघातील मृत्यू झालेल्या २४ हजार ३४५ मतदारांची नावे डिलीट करण्यात आली. २२ हजार ५९० मतदारांनी मतदारसंघ बदलला. ९ डिसेंबरपर्यंत दावे व हरकती स्वीकारण्यात येणार आहेत. २६ डिसेंबरपर्यंत दावे व हरकती निकाली काढण्यात येणार आहेत. अंतिम मतदारयादी ५ जानेवारी २०२४ रोजी प्रसिद्ध करण्यात येणार आहे. अंतिम मतदारयादीत दोन लाख मतदारांची संख्या वाढविण्याचे उद्दिष्ट डोळ्यापुढे ठेऊन प्रशासनाने काम हाती घेतले आहे. महिलांची संख्या अधिकाधिक वाढविण्यावरही भर असेल, असे प्रशासनाकडून सांगण्यात आले.
येथे स्त्रियांची संख्या अधिकमतदार संघ : पुरुष मतदार : महिला मतदार
दक्षिण पश्चिम : १,८३,५४३ : १,८४,२०८
दक्षिण : १,७८,४६९ : १,८०,२०५शहरातील इतर : पुरुष मतदार : महिला मतदार
पूर्व : १,९२,७२५ : १,८३,००१
मध्य : १,५५,०२८ : १,५३,१३१
पश्चिम : १,७६,४३२ : १,७५,६६८
उत्तर : १,९६,४४९ : १,९३,७३१
तृतीयपंथीय केवळ २७६
मतदार नोंदणी करताना पूर्वी केवळ पुरुष आणि महिला असे दोनच वर्ग होते. मात्र तृतीयपंथीयांनाही स्वत:ची स्वतंत्र ओळख असून तसा कॉलम मतपत्रिकेत उपलब्ध करून द्यावा, अशी मागणी करण्यात येत होती. त्यानुसार ही नोंदणी होऊ लागली आहे. अशी व्यवस्था सुरू करण्यालाही आता बरीच वर्षे झाली. मात्र, तृतीयपंथीय मतदारांच्या रकान्यातील संख्या तुलनेने कमी असल्याचे चित्र आहे. नागपूर जिल्ह्यात केवळ २७६ तृतीयपंथीय मतदार आहेत. यापूर्वीची अनेक नावे पुरुष किंवा महिलेच्या रकान्यात नोंद असल्याने ही संख्या कमी दिसते. तृतीयपंथीयांच्या इच्छेनुसारच त्यांचे नाव पुरुष-महिला किंवा तृतीयपंथीयांमध्येही नोंदविले जात असल्याचे प्रशासनाकडून सांगण्यात आले.
Users Today : 17