स्पर्धा परीक्षेचा पाच वर्ष अभ्यास पण पदरी अपयश, निराश न होता माळरानावर फुलवली फळबाग, मराठवाड्यात सफरचंद-काजूची लागवड

शेतकरी नंदकिशोर गायकवाड यांनी बी. ए. पर्यंत शिक्षण घेऊन पुणे येथे स्पर्धा परीक्षेची तयारी सुरू केली होती. सलग पाच वर्ष स्पर्धा परीक्षेची तयारी केली. परंतु यात त्याला यश आले नाही. दरम्यान कोरोना काळात ते गावाकडे परतले. आपल्या १० एकर माळरान जमिनीवर त्यांनी फळबाग लागवड करण्याचा निर्णय घेतला. एरव्ही या माळरानावर कुठलही पीक येत नव्हते. नंदकिशोर यांनी या जमिनीत फळबाग लागवड करण्याचा धाडसी निर्णय घेतला. माळरानावर फळबाग फुलवणे हे जिकरीच असतं, त्यामुळे त्यांना अनेकांनी वेड्यात काढलं. परंतु जिद्द आणि मेहनतीच्या जोरावर नंदकिशोर आपल्या निर्णयावर ठाम राहत माळरान जमिनीवर फळबाग लागवडीचा यशस्वी प्रयोग केला.सध्या या शेतीत अंबा, पेरू, चिकू, काजू, जांभूळ, डाळिंब, सीताफळ, रामफळ, एव्हढच नाहीतर सफरचंद, अंजीर, विलायची, असे जवळपास ५० हुन अधिक फळांची झाडे आहेत. यात पेरुची ३ हजार झाडे, अंबा १ हजार, काजू ५००, लिंबू १ हजार झाडे असून मागील वर्षी पेरूच्या उत्पादनातून १३ लाख रुपये उत्पन्न मिळाल्याचे शेतकरी नंदकिशोर यांनी सांगितले. यावर्षी देखील पेरूच्या उत्पादनातून जवळपास २० लाखाहून अधिक उत्पन्न मिळण्याची अपेक्षा या शेतकऱ्याला आहे. तसेच अंबा, काजू, जांभूळ डाळिंब सीताफळ रामफळ या फळबागे पासून मिळणारे उत्पन्न देखील लाखो रुपये आहे. या तरुण शेतकऱ्याला त्याचे आई-वडील देखील शेतीत मदत करत असतात.सक्षम सिंचनाची तयार केली व्यवस्था

नंदकिशोर यांनी सुरूवातीला माळरानावर पीक लागवड करण्यापूर्वी सक्षम सिंचनक्षमता तयार केली. माळरानावर विहीर खोदली. त्यानंतर माळराणाखाली बोअर पाडून विहिरीमध्ये सोडले. सुक्ष्म सिंचन व्यवस्था तयार केली. तसेच उत्पादित मालाला स्थानिक बाजारपेठे सोबतच जिल्हा शेजारील परभणी, हिंगोली या ठिकाणी सुद्धा मागणी आहे, असे नंदकिशोर सांगतात. दरम्यान नांदेड जिल्ह्यात एकीकडे शेतकरी आत्महत्यांचे प्रमाण अधिक असताना नंदकिशोर यांनी माळरानावर राबवलेला यशस्वी प्रयोग हा प्रेरणादायी आहे.