किराणा महागाईने दिवाळी फराळ ‘बेचव’! डाळी, बेसन आवाक्याबाहेर; खाद्यतेलांचा दिलासा

नाशिक : दिवाळीच्या उत्साहात आनंद पेरणारा चटकदार फराळालाही यंदा महागाईचा फटका बसणार आहे. बेसन आणि डाळींसह फराळासाठी वापरल्या जाणाऱ्या सर्वच वस्तूंचे दर वाढल्याने सर्वसामान्यांची दिवाळी काहीशी कडवट होणार आहे. मात्र, यातही गेल्या अनेक दिवसांपासून खाद्यतेलांचे दर स्थिर असल्याने नाशिककरांना काही प्रमाणात दिलासा मिळत आहे.आठवडाभरावर दिवाळी आली आहे. भाजीपाला आणि कांद्यांच्या चढ्या दरांमुळे नाशिककर बेहाल झाले आहेत. अशातच बाजारात भाजके पोहे, पातळ पोहा, मका पोहे, मुरमुरे, भडंग पोहे, गूळ, साखर, रवा, मैदा, बेसन, खोबरे, खाद्यतेल अशा विविध वस्तूंची मागणी वाढली आहे. यामुळे दरांतही काही प्रमाणात वाढ झाली आहे. किरकोळ बाजारात बेसन पिठासह डाळींच्या दरांनी शंभरी गाठली आहे. त्यामुळे चिवड्याची चव वाढविणारी खुसखुशीत शेवसाठीही अधिकचे पैसे मोजावे लागणार आहे. किरकोळ बाजारात इतर वस्तूंचे दर वाढलेले असतानाच खाद्यतेलांचे दर मात्र स्थिर आहेत. त्यामुळे वाढत्या महागाईतही सर्वसामान्यांना अल्पसा दिलासा मिळत आहे.