पुणे: पुणे महानगर परिवहन महामंडळाच्या (पीएमपी) बसमध्ये हडपसर ते स्वारगेट प्रवासात एका महिलेने मंगळसूत्र चोरांचा प्रतिकार करीत मंगळसूत्र चोरांच्या हाती जाण्यापासून वाचवले. एवढेच नाही, तर पीएमपीचालक, वाहकाच्या मदतीने त्या चोरांना पोलिसांच्या ताब्यातही दिले. मात्र, चोरांच्या तावडीतून वाचविलेले मंगळसूत्र गुन्हा दाखल झाल्यानंतर पोलिसांच्या ताब्यातून पुन्हा मिळविण्यासाठी दोन महिने संघर्ष करावा लागला.दोन महिन्यांपूर्वी एक महिला खासगी कामानिमित्त हडपसर येथून स्वारगेटला पीएमपीने येत होती. त्या वेळी महिलेच्या गळ्यात अडीच तोळे सोन्याचे मंगळसूत्र होते. स्वारगेट परिसरात बस आली असताना, तीन चोरटे महिलेच्या मागे घोळक्याने थांबले. बसमध्ये गर्दी असल्याचा गैरफायदा घेऊन एका चोराने महिलेच्या गळ्याभोवती गुंडाळलेला स्कार्प बाजूला केला. एक चोर महिलेचे मंगळसूत्र दाताने तोडू लागला. ही गोष्ट लक्षात येताच महिलेने मंगळसूत्र हाताने घट्ट पकडले आणि आरडाओरडा केला. हा प्रकार पीएमपीचालकाच्या लक्षात येताच त्यांनी बसचे दरवाजे बंद केले आणि बस थेट स्वारगेट पोलिस ठाण्यात नेली.तिन्ही चोरांना पोलिसांच्या ताब्यात देण्यात आले. त्यावेळी महिलेने घडलेला प्रकार सांगितला. त्यावर पोलिसांनी ‘तुम्ही तक्रार द्या, आपण गुन्हा दाखल करू’ असे सांगितले. मात्र, गुन्हा, कोर्टकचेरी, या सगळ्या गोष्टींपासून अनभिज्ञ असलेल्या महिलेने तक्रार देण्यास नकार दिला. मात्र, या चोरांना शिक्षा झाली पाहिजे, त्यासाठी तक्रार द्या, असे आवाहन पोलिसांनी केले. सुरुवातीला तक्रारीस नकार देणाऱ्या महिलेने नंतर तक्रार दिली आणि चोरांवर गुन्हा दाखल झाला.तारीख पे तारीख’
मंगळसूत्र पोलिसांकडे जमा करावे लागेल, याची कल्पना महिलेला गुन्हा दाखल करेपर्यंत नव्हती. ‘दोन दिवसांत तुमचे मंगळसूत्र परत केले जाईल,’ या पोलिसांनी दिलेल्या आश्वासनावर विश्वास ठेऊन महिलेने मंगळसूत्र पोलिसांकडे जमा केले. मात्र, दोन दिवसांनी मंगळसूत्र घेण्यासाठी महिला पोलिस ठाण्यात पोहोचली असता महिलेला मोठा धक्का बसला. ‘मंगळसूत्र देण्यासाठी न्यायालयाचा आदेश लागेल. तुम्ही न्यायालयात जाऊन आदेश आणा,’ असे महिलेला सांगण्यात आले. महिलेने न्यायालयाची पायरी चढली. मंगळसूत्र परत मिळावे, अशी मागणी न्यायालयाकडे केली. त्यासाठी दोन महिन्यांत नऊ तारखा पडल्या. मात्र, मंगळसूत्र मिळाले नाही.
व्हायरलची धमकी; अन् त्वरित मिळाले मंगळसूत्र
महिलेला मंगळसूत्र मिळविण्यासाठी पोलिस, सरकारी वकील आणि आरोपींचे वकील आदींचे म्हणणे (से) न्यायालयाने सादर करण्यास सांगितले. त्यावर महिलेने पोलिस आणि सरकारी वकिलांचा ‘से’ सादर केला. मात्र, आरोपीच्या वकिलांचा ‘से’ कोठून मिळवणार, असा प्रश्न त्यांना पडला. न्यायालयीन कामकाजातील एका व्यक्तीने त्यांना मदत केली. त्याद्वारे तीनपैकी दोन आरोपींच्या वकिलाचा ‘से’ प्राप्त झाला. मात्र, तिसऱ्या आरोपीच्या वकिलाने ‘से’ दिला नाही. त्यामुळे मंगळसूत्र परत मिळविण्याच्या प्रक्रियेला खीळ बसली. त्यानंतर महिलेने ३१ ऑक्टोबरला स्वारगेट पोलिस ठाण्यात धाव घेऊन तिला भेडसावणाऱ्या अडचणी सांगितल्या. तसेच, ‘तुम्हीच मला मंगळसूत्र द्या, नाहीतर मी घडलेला सर्व प्रकार समाज माध्यमावर व्हायरल करेन’ असे सांगितल्यानंतर पोलिसांनी महिलेला त्वरित मंगळसूत्र परत केले.
या घटनेत चोरीचा प्रयत्न झाला. प्रत्यक्ष चोरी झाली नाही. त्यामुळे पोलिसांनी गुन्हा दाखल केल्यानंतर महिलेचे मंगळसूत्र स्वत:च्या ताब्यात घेणे बेकायदेशीर आहे. या प्रकारामुळे महिलेला मानिसक त्रास सहन करावा लागला. अशा प्रकारांमुळे सामान्य नागरिक गुन्हा दाखल करण्यासाठी पुढे येणार नाहीत, असं अॅडव्होकेट राकेश सोनार यांनी सांगितलं.
Users Today : 12