मनोरुग्ण महिला बसच्या केबिनमध्ये घुसली; अन् थेट स्टेअरिंगवर ताबा, प्रवाशी घाबरले, नंतर जे घडलं त्यानं…

वाशिम: बस स्थानकावर उभ्या असलेल्या एसटी बसचे स्टेअरिंग एका मनोरुग्ण महिलेने ताब्यात घेतल्याने एकच खळबळ उडाली. वाशिम एसटी बस स्थानकावर रिसोडला जाणारी बस उभी करून चालक नोंद करण्यासाठी नियंत्रण कक्षात गेला. त्यानंतर एक मनोरुग्ण महिला बसच्या केबिनमध्ये घुसली आणि तिने स्टेअरिंगचा ताबा घेतला.दरम्यान बसमध्ये प्रवाशी बसत असल्याने काही वेळ हा प्रकार कुणाच्या ही निदर्शनास आला नाही. मात्र बस स्थानकावरील एका वाहकाच्या हा प्रकार निदर्शनास आल्यानंतर एकच खळबळ उडाली. त्यानंतर एसटीचे सुरक्षा रक्षक, चालक आणि वाहकाने या महिलेला स्टेअरिंगवरून खाली उतरण्याची विनंती केली. मात्र ती ऐकण्याच्या मनस्थितीमध्ये नव्हती. अखेर त्या महिलेच्या मुलाने आणि सुरक्षा रक्षकांनी त्या मनोरुग्ण महिलेला बसच्या खाली उतरविल्याने सर्वांनी सुटकेचा निश्वास सोडलाअनेक एसटी बसला सुरू किंवा बंद करण्यासाठी चावी नसते. त्या बस विना चावी बटणावर सुरू होतात. सुदैवाने या बसला चावी होती. तसेच चालकाने चावी काढून बटन बंद केले होते. जर त्या बसला चावी असती तर ती बस त्या मनोरुग्ण माहिलेने सुरू केल्यानंतर मोठा अनर्थ घडला असता. या घटनेमुळे प्रवाशांच्या सुरक्षेचा मुद्दा पुन्हा ऐरणीवर आला असून एसटी महामंडळाने उपाययोजना करण्याची मागणी होत आहे.