हिंगोली: जालना जिल्ह्यातील अंतरवाली सराटी येथील सभेवरून गावाकडे परतत असताना हिंगोलीमधील वसमत तालुक्यातील सिंगी येथे तरुणाच्या दुचाकीला अपघात होऊन तरुणाचा जागेवरच मृत्यू झाला तर या घटनेत एक जण गंभीर जखमी झाल्याची दुर्दैवी घटना घडली आहे. या दुर्दैवी घटनेतील तरुणावर आज १५ ऑक्टोंबर रोजी कळमनुरी तालुक्यातील येळेगाव तुकाराम येथे अंत्यसंस्कार करण्यात आले.मिळालेल्या माहितीनुसार, मयत मंगेश संभाजी काळे (२०) असं या तरुणाचं नाव आहे. कळमनुरी तालुक्यात असलेल्या येळेगाव तुकाराम येथील मंगेश संभाजी काळे आणि त्याचा मित्र सचिन बालाजी काळे (२०) हे दोघे त्यांच्या दुचाकीवरून अंतरवली सराटी येथे मराठा आरक्षणासाठी मनोज जरांगे पाटील त्यांच्या सभेसाठी गेले होते. त्यांची सभा झाल्याच्या नंतर दोघे मित्र सायंकाळच्या सुमारास आपल्या दुचाकीवरून घाई घाईने आपल्या गावाकडे परत निघाले. शनिवारी तारीख १४ रोजी दहा साडेदहाच्या सुमारास अंधारात वसमत तालुक्यातील सिंगी या घाटामध्ये दुचाकी आली असता अंधाराचा अंदाज न आल्याने एका वाहनाने त्यांच्या दुचाकीला जबर धडक दिली.
या अपघातात मंगेशचा जागेवरच मृत्यू झाला असून पाठीमागे बसलेला मित्र सचिन हा गंभीर जखमी झाला आहे. या अपघातात पाठीमागे बसलेल्या सचिनच्या हाताला व पायाला गंभीर मार लागल्याने जखमी झाला आहे. अशा अवस्थेत या प्रकाराची माहिती त्याने आपल्या पाठीमागून येणाऱ्या गावातील नागरिकांना दिली. यामध्ये गावकऱ्यांनी घटनास्थळी येऊन तातडीने जखमी असलेल्या सचिन यास उपचारासाठी नांदेडला खाजगी रुग्णालयात पाठवले आहे.या घटनेची माहिती मिळताच कुरुंदा पोलीस स्टेशनचे सहाय्यक पोलीस निरीक्षक गजानन मोरे जमादार बाभळे यांच्या पथकाने घटनास्थळी धाव घेतली होती. या घटनेमध्ये मंगेश काळे यांच्यावर आज दुपारच्या सुमारास त्याचे गावी येळेगाव तुकाराम येथे अंत्यसंस्कार करण्यात आले आहेत. बीकॉममध्ये प्रथम वर्षात शिकत असलेल्या मंगेशला काळाने हिरावल्याने आई वडिलांचे स्वप्न मात्र भंगले आहे. या दुःखद घटनेमुळे येळेगाव तुकाराम परिसरातील नागरिक हळहळ व्यक्त करत आहेत.
Users Today : 4