नवी मुंबई : नवी मुंबई महापालिकेच्या अतिक्रमणविरोधी विभागाचे उपायुक्त डॉ. राहुल गेठे यांची मालमत्ता विभागाच्या उपायुक्तपदी तडकाफडकी बदली करण्यात आली आहे. त्यांच्या बदलीने पालिका वर्तुळात खळबळ उडाली असून शहरातील अनधिकृत बांधकामे करणाऱ्यांनी सुटकेचा निश्वास सोडला आहे. पदभार सांभाळल्यापासून त्यांनी शहरातील अनधिकृत बांधकामांना लक्ष्य करून शहरातील हॉटेल, बार अँड रेस्टॉरंटमधील अनधिकृत बांधकामांवर हातोडा चालवला होता. त्यामुळे त्यांच्याविरोधात आयुक्तांसह मुख्यमंत्री कार्यालयात तक्रारींचा पाऊस पडला होता. त्यामुळेच त्यांची बदली करण्यात आल्याची चर्चा महापालिकेत सुरू आहे.डॉ. राहुल गेठे यांनी महिनाभरापूर्वीच नवी मुंबई महापालिकेत अतिक्रमण उपायुक्तपदी नियुक्ती करण्यात आली होती. मागील चार वर्षांत शहरात मोठ्या प्रमाणात अनधिकृत बांधकामे झाली आहेत. रहिवासी इमारतींसह हॉटेल, बार, दुकाने यांनीही अनधिकृत बांधकामे केली आहेत. अतिक्रमणविरोधी विभागाचा पदभार स्वीकारल्यापासून डॉ. राहुल गेठे यांनी शहरातील अनधिकृत बांधकामांना लक्ष्य केले होते. अनधिकृत इमारतींसह हॉटेल, बारमधील बांधकामे आणि शेडवरही कारवाई करण्यात आली. त्यामुळे या सर्वांनी महापालिका आयुक्तांसह मुख्यमंत्र्यांकडे तक्रारी केल्या होत्या. काहींनी तर यासाठी मंत्रालयात फेऱ्या मारायलाही सुरुवात केली होती. त्यानुसारच त्यांच्यावरही कारवाई केली गेली असल्याची चर्चा पालिका वर्तुळात रंगली आहे. आता उपायुक्त सोमनाथ पोटरे यांच्याकडे अतिक्रमणविरोधी विभागाचा अतिरिक्त कार्यभार सोवण्यात आला आहे.शहर अभियंता विभागातही बदल
कार्यकारी अभियंता अरविंद शिंदे यांच्याकडे सध्याच्या कामाव्यतिरिक्त संपूर्ण महापालिका कार्यक्षेत्रातील पाणीपुरवठा व्यवस्थापनाची जबाबदारी सोपवण्यात आली आहे. नेरूळ विभाग कार्यालयातील शाखा अभियंता सुधाकर मोरे यांच्याकडे कार्यकारी अभियंतापदाचा कार्यभार सोपवण्यात आला आहे. मोरे यांच्याकडे संपूर्ण पालिका कार्यक्षेत्रातील मलनि:सारण व्यवस्थापनाचे काम सोपवण्यात आले आहे. सार्वजनिक आरोग्य अभियांत्रिकी विभागातील शाखा अभियंता किशोर अमरनानी यांना नेरूळ विभाग कार्यालयाचा उपअभियंता (स्थापत्य) पदाचा कार्यभार सोपवण्यात आला आहे.
Users Today : 81