फटाके विक्रेत्याच्या घरात साफसफाई करताना बालमजुराचा अंत; कुटुंबावर दु:खाचा डोंगर

बोहरा बाजारात राजकमल सिनेमाच्या रांगेत अनिल अग्रवाल यांचं फटाक्यांचं दुकान आहे. अग्रवाल यांनी सुनिल आणि त्याचा मित्र सागर शिंदे अशा दोघांना त्यांच्या गणेश कॉलनीतील घरी साफसफाईच्या कामासाठी पाठवलं होतं. बुधवारी सकाळी दोघे अग्रवाल यांच्या झाडलोट करत होते. तेव्हा सुनिलचा पाय खाली पडलेल्या विद्युत तारेवर पडला. उघड्या तारेतून विजप्रवाह पूर्ण क्षमतेनं सुरू होता. सुनिलला शॉक लागला आणि तो जागीच कोसळला. त्याला जिल्हा शासकीय वैद्यकीय महाविद्यालयात नेण्यात आलं. पण डॉक्टरांनी त्याला मृत घोषित केलं. याबद्दल समजताच सुनिलच्या कुटुंबानं रुग्णालयात धाव घेतली. सुनिलच्या मृत्यूबद्दल कळताच कुटुंबानं आक्रोश केला.सुनिलच्या कुटुंबाची आर्थिक परिस्थिती हलाखीची आहे. सुनिल मिळेल ते काम करुन कुटुंबाचा आर्थिक गाडा चालवायला मदत करायचा. त्यातच दिवाळी जवळ आली असल्यानं अधिकचं काम करुन दोन जास्त पैसे पदरात पडले या आशेनं तो अग्रवाल यांच्या घरात साफसफाईचं काम करण्यासाठी गेला. पण तिथे मृत्यूनं त्याला गाठलं. कुटुंबाच्या आर्थिक स्थितीची जाण असलेल्या सुनिलच्या मृत्यूमुळे परिसरावर शोककळा पसरली आहे.