उद्धव ठाकरे महायुतीत आल्यास त्यांना उपमुख्यमंत्री पद देणार; जाणून घ्या कुणी दिली ऑफर?

यवतमाळ: प्रधानमंत्री नरेंद्र मोदी किंवा गृहमंत्री अमित शहा नितीन गडकरी यांच्याबाबत कुठलाही आकस ठेवत नाही. त्यामुळे या गैर समजुतीच्या आधारावर उद्धव ठाकरे गटाच्या विनायक राऊत यांनी नितीन गडकरी यांना दिलेल्या पंतप्रधानपदाच्या ऑफरमध्ये काहीही तथ्य नाही. उलट उद्धव ठाकरे महायुतीत आल्यास त्यांना उपमुख्यमंत्री पद देण्यात येईल, असे वक्तव्य आज सामाजिक न्याय मंत्री रामदास आठवले यांनी केले. ते यवतमाळ येथे आयोजित पत्रकार परिषदेत बोलत होते.पुढे बोलताना ना. रामदास आठवले यांनी आज झालेल्या रिपब्लिकन पार्टीच्या विदर्भस्तरीय कार्यकर्त्यांच्या मेळाव्याबाबत माहिती दिली. तसेच आगामी लोकसभा, विधानसभा, जिल्हा परिषद, महानगरपालिका, नगरपंचायत, पालिका निवडणुकीत महायुतीसोबत राहणार असल्याचे त्यांनी सांगितले. अजितदादा पवार सुध्दा आता महायुतीसोबत आल्याने अधिक यश मिळणार असल्याचे त्यांनी सांगितले. लोकसभेसाठी दोन जागा मिळाल्या पाहिजे, अशी आमची मागणी आहे. असे झाल्यास एका जागेवर मी स्वतः निवडणूक लढणार असल्याचे त्यांनी सांगितले. भाजपा छोट्या राजकीय पक्षांना संपविण्याचे काम करीत असल्याचा आरोप विरोधक करीत आहे. मात्र बीजेपीने छोट्या मोठ्या पक्षांनाही मंत्री पद देऊन त्यांचा सन्मान केला आहे. त्यामुळे या आरोपात तथ्य नसल्याचे ते म्हणाले.दरम्यान कांद्याच्या वाढत्या दरावरून राज्यात राजकारण तापले आहे. शिंदे-फडणवीस आणि पवार सरकारवर विरोधक सातत्याने हल्लाबोल करत आहे. त्याचवेळी केंद्रीय मंत्री रामदास आठवले यांनी महाविकास आघाडीचा खरपूस समाचार घेतला आहे. नागपुरात पत्रकारांशी संवाद साधताना कांद्यासंदर्भात विचारलेल्या प्रश्नाला उत्तर देताना आठवले म्हणाले, कांद्याचे भाव कमी व्हावेत आणि त्यांना त्रास होऊ नये, यासाठी सरकार तोडगा काढण्याचा प्रयत्न करत आहे. यासोबतच आपल्या कवितेने महाविकास आघाडीला फटकारताना ते म्हणाले, “महाराष्ट्रात मोठ्या प्रमाणात पिकतो कांदा, अन् महाविकास आघाडीचा झाला वांदा”, अशी कविता त्यांनी केली.