दिवाळीत कामगारांना मिळाली खूशखबर; अंबड MIDCतील १२ कारखान्यांत बोनस जाहीर

सातपूर : अंबड औद्योगिक वसाहतीत कामगारांसाठी यंदा खूशखबर मिळाली आहे. सीटू संलग्न १२ कारखान्यांमध्ये दिवाळीचा बोनस नुकताच जाहीर झाल्याने कामगारांमध्ये उत्साहाचे वातावरण आहे. सरासरी २० ते ७५ हजार रुपयांपर्यंत बोनस कामगारांना मिळणार असल्याचे सीटूचे राष्ट्रीय उपाध्यक्ष तथा कामगार नेते डॉ. डी. एल. कराड यांनी सांगितले.या कारखान्यांत २० टक्के किंवा महिन्याचा पगार बोनस म्हणून जाहीर करण्यात आला आहे. यात नोव्हाटिअर, अॅडम फॅब्रिवर्क, फिनोटेक्स फायबरकास्ट, अल्फ इंजिनीअरिंग, आर्ट रबर इंडस्ट्रीज, ब्लू क्रॉस लॅबोरॅटरिज, ल्युसी इलेक्ट्रीकल इंडिया, नाशिक ऑटोटेक, ग्लोबटेक मेटलक्राप्ट, तुषार इंडस्ट्रीज व तुषार प्रिसिजन, सुमो ऑटोटेक, रिलाएबल ऑटोटेक या कारखान्यांचा समावेश आहे. बोनस जाहीर झाल्याने कामगारांच्या कुटुंबीयांमध्ये आनंदाचे वातावरण आहे. या बोनस करारासाठी सीटूचे सीताराम ठोंबरे, देविदास आडोळे, संतोष काकडे, तुकाराम सोनजे, सतीश खैरनार, आत्माराम डावरे, अरविंद शहापुरे, संदीप कातोरे आणि संबंधित कंपनीमधील व्यवस्थापक व समिती सदस्य उपस्थित होते.