समृद्धी महामार्गावर धावणाऱ्या खासगी बसेसचा ‘फिटनेस’ तपासा; पोलिस आयुक्तांचे निर्देश

नागपूर : हिंदू हृदयसम्राट बाळासाहेब ठाकरे समृद्धी महामार्गावर होणारे अपघात रोखण्यासाठी पोलिस व अन्य संबंधित विभागांनी ठोस उपाययोजना आखण्यास सुरुवात केली आहे. याअंतर्गतच आता या महामार्गावर धावणाऱ्या प्रत्येक खासगी बसेस व त्यांच्या चालकांचे फिटनेस प्रमाणपत्र सोबत असणे गरजेचे करण्यात आले आहे. याबाबतचे आदेश पोलिस आयुक्त अमितेशकुमार यांनी दिले. सिव्हिल लाइन्समधील पोलिस भवन येथे बुधवारी वाहतूक पोलिस, महामार्ग पोलिस, आरटीओ, खासगी बसमालक व एसटीच्या अधिकाऱ्यांची संयुक्त बैठक झाली. त्यावेळी आयुक्तांनी हे निर्देश दिले.बसमधील प्रवाशांची सुरक्षा महत्त्वाची आहे. खासगी बसचालकांनी या मार्गांवर धावणाऱ्या सर्वच बसचे क्रमांक, चालकाचा मोबाइल क्रमांक तसेच त्याच्याशी संबंधित संपूर्ण माहिती संबंधित यंत्रणांना आधीच द्यावी. महामार्गाच्या सुरुवातीला तसेच निर्धारित स्थळावर चालकाने दारू प्यायली आहे किंवा नाही याची ब्रेथ अॅनालायझरने तपासणी करावी. बसमध्येही हे यंत्र असावे. प्रवाशांना चालकाबाबत तक्रार करायची असल्यास बसमध्ये मालकाचे नाव, त्याचा मोबाइल क्रमांक असलेले स्टीकर प्रवाशांना ठळकपणे दिसतील, अशाप्रकारे लावावे. या सोयी उपलब्ध करून देण्यासाठी बसमालकांना नियमानुसार नोटीस बजावण्यात येणार आहे, अशी माहिती अमितेशकुमार यांनी दिली.बसस्थानकापासून २०० मीटरच्या आत असणाऱ्या ट्रॅव्हल्स जप्त करण्याचा इशारा आयुक्तांनी पुन्हा एकदा बसमालकांना दिला. नियमानुसार बसस्थानक परिसरात बस पार्क करू नये, असेही आयुक्तांनी बजावले. बसस्थानक परिसरातील जाधव चौकात मोठ्या प्रमाणात खासगी बस पार्क करण्यात येतात. त्यामुळे या भागात नेहमीच वाहतुकीला अडथळा निर्माण होतो. बसमालकांनी एसटीच्या भाड्यापेक्षा ५० टक्के अधिक भाडे खासगी बसमालक प्रवाशांकडून घेऊ शकतात. अधिक भाडे आकारणाऱ्या मालक व चालकांविरुद्ध आरटीओने कारवाई करावी. तसेच खासगी बसेसमधून मालवाहतूक होऊ नये याचीही काळजी घेण्यात यावी. प्रवाशांसह मालवाहतूक करणाऱ्या बसमालकांविरुद्धही कारवाई करण्यात यावी, अशा सूचनाही अमितेशकुमार यांनी आरटीओच्या अधिकाऱ्यांना केल्या.
वाहतुकीला अडथळा ठरणाऱ्या बसथांब्यांचा अभ्यास

ज्या ठिकाणी बसथांबे आहेत, तेथे खासगी बसचाही थांबा आहे. रेल्वेस्थानकाजवळील मानस चौक, वर्धा मार्गावरील कृपलानी चौक, छत्रपती चौक, बोले पेट्रोल पंप चौक, भांडे प्लॉट, दिघोरी चौक, रविनगर आदी ठिकाणी खासगी बसमुळे वाहतुकीची मोठी कोंडी होते. सध्या शहरात रस्ते व पुलांचे काम सुरू असल्याने वाहतूक कोंडीत भर पडली आहे. हे थांबे अन्य ठिकाणी स्थलांतरीत केल्यास वाहतूक व्यवस्थेत काय फरक पडेल, याचा अभ्यास करण्याचे निर्देश अमितेशकुमार यांनी वाहतूक पोलिस, आरटीओ व एसटीच्या अधिकाऱ्यांना दिले.