नाशिक : ‘आमरण उपोषण करणाऱ्या मनोज जरांगे पाटील यांचा अंत सरकार पाहत आहे. आमच्या घरातील दिवा विझविण्याचा प्रयत्न सरकार करीत असेल, तर दिवाळीत एकाही मराठ्याच्या घरात दिवा पेटविला जाणार नाही. मराठा समाज यंदा काळी दिवाळी साजरी करेल. आरक्षण मिळाल्यानंतरच दिवाळी साजरी करण्यात येईल,’ असा निर्धार सकल मराठा समाजाने बुधवारी व्यक्त केला.मराठा समाजाला आरक्षण मिळावे या मागणीकरिता सुरू असलेल्या आंदोलनाला पाठबळ देण्याकरिता सकल मराठा समाजाची बैठक बोलावण्यात आली होती. सीबीएस येथील छत्रपती शिवाजी स्मारकाच्या आवारात झालेल्या या बैठकीला मराठा समाजातील विविध पक्षांचे नेते, पदाधिकारी, सामाजिक संघटनांचे पदाधिकारी मोठ्या संख्येने उपस्थित होते.
निफाड शहरातून सर्वपक्षीय बंदला उत्स्फूर्त प्रतिसाद लाभला. येथे चार तरुण बेमुदत उपोषणाला बसले आहेत. दरम्यान, मंगळवारी सायंकाळी निफाड शहरातून काढण्यात आलेल्या कँडल मार्चमध्ये मोठ्या संख्येने समाजबांधव सहभागी झाले होते. येवला तालुक्यातील रास्ते सुरेगाव व अंगणगाव येथे नाशिक-छत्रपती संभाजीनगर महामार्गावर बुधवारी सकाळी मराठा समाजबांधवांनी रास्ता रोको आंदोलन केले. कायमच गजबज असणारी त्र्यंबकेश्वरनगरी दोन दिवसांपासून शांत झाली आहे. राज्यातील बीड आणि अन्य काही भागात बसची जाळपोळ, अनेक भागात बंद, रोखलेले रस्ते यामुळे भाविकांचा ओघ थांबला आहे. बुधवारी मंदिराच्या दर्शनबारीत शुकशुकाट होता. माडसांगवी-शिलापूर टोल नाक्यावर रास्ता रोको आंदोलन केले. तर चांदवड तालुक्यातील निंबाळे पंचक्रोशीतील संतप्त मराठा समाजबांधवांनी बुधवारी सकाळी मनमाड-लासलगाव रस्त्यावर ठिय्या आंदोलन केले.
निफाड : तालुक्यातील सारोळे खुर्द येथे बुधवारी सकाळी अन्न व औषध प्रशासनमंत्री छगन भुजबळ यांचे नाव असलेली कोनशिला मराठा आंदोलकांनी फोडून त्यांचे नाव खोडले. सारोळे खुर्द येथे २४ ऑक्टोबर रोजी झालेल्या विकासकामांच्या उद्घाटनाच्या कोनशिलेवर उद्घाटन म्हणून असलेले छगन भुजबळ यांचे नाव मराठा आंदोलकांनी छनीने फोडून टाकले. भुजबळ यांचा मराठा समाजाला ओबीसीतून आरक्षण देण्यास विरोध असल्याने त्यांचा निषेध करीत हे आंदोलन करण्यात आले.
Users Today : 63